Danmarkimi umiarsualivissaq suli inissinngilaq
Danmarkimi illoqarfik sorleq nunatsinnukartussanut siunissami umiarsualiviussanersoq suli nalunarallarpoq.
Aatsaat aggutsip ulluisa 28-anni sorliunissaa nalunarunnaassaaq, tassami Namminersornerullutik Oqartussat suliariumannittussarsiornerat ulloq taanna naammassineqassaaq.
Aalborg, Esbjerg Århusiluunniit. Taakku arlaat nunatsinnukartut nunatsinneersullu umiarsualivissaattut toqqarneqarumaarpoq, Kalaallit Nunaata Danmarkimi ukiortaaq 2008 aallarnerfigalugu umiarsualivigilissallugu.
Suliariumannittussarsiuussineq marloqiusanngorlugu aaqqissuussaavoq. Immikkoortoq siulleq piumasaqaatit ataatsimiissutiginerinik imaqarnerussaaq, immikkoortut aappaat illoqarfiit sunik neqerooruteqarnerinik imaqassalluni.
Nunatta Danmarkimi umiarsualiveqarnera Namminersornerullutik Oqartussat suliffeqarfimmut Royal Arctic Line-mut isumaqatigiissuteqarnikkut ukiorpassuani ingerlanneqarpoq, nunatsinniit nunatsinnullu assartuineq annermik ingerlanneqartarluni.
Attaveqarnermut pisortaqarfik immikkoortunik sisamanik piumasaqaateqarpoq:
Siullertut ajornannginnerpaamik Danmarkimit Danmarkimullu nioqqutissanik assartuineq.
Tulliatut aalaakkaasumik kinguaattoorfiunngitsumillu umiarsuartigut attaveqarneq.
Pingajuattut unammillersinnaassuseqarnissaq, nunami namminermi nunanullu allanut assartuinermi.
Grønlandshavn-i aamma tassaassaaq nioqqutissanut immikkuullarissunut, nunatsinneersunut nunanillu allaneersunut qitiusumik nakkutilliiviusussaq.
Taamaattumik Attaveqarnermut pisortaqarfiup suliariumannittussarsiuussinermi pingaartippaa piumasaqaatini taasat siulliit pingasut naammassisinnaassagai.
Qanorli umiarsualivimmik ingerlatsinerup akeqarnissaa naliliinissami pingaarnersaassaaq, tulliulluni pitsaassuseq umiarsualiviullu qanoq atorneqarsinnaanera pingajuussalluni.
