Danmarkimi ullaassaq nuna sajuppoq

Ullaassaaq Danmarkimi nuna sajuppoq. Danmarkip annersaani Sverigillu kujasinnerusortaani ullaassaq Danmarkimi nalunaaqutaa malillugu arfineq qaangerlugu tanneq sisamat missaanni nuna sajuppoq.
decembarip 16-at 2008 05:24

Nunap sajunnerata sakkortunerpaaffia Malmømit 40 kilometerit avannamut kangisinnerusortaani 4,8-mik sakkortussuseqarsimavoq.

Danmarkimi ukiuni kingullerni 80-ini nunap sajunneranik uuttuisarnermi aatsaat taamak sakkortutigisumik nuna sajuppoq.

Nunap sajunnera sekundit tallimat missaanni sivisussuseqarpoq, tamannalu Københavnimi eqqaanilu annerusumik malugineqarsimavoq, taamaakkaluartorli aamma Jyllandimi aamma malugineqarsimalluni.

Nunap sajunnera pillugu Sjællandimi inuppassuit politiinut siarngutigisimavaat.

- Illuni portusuuni najugallit ernumallutik siarngussimapput. Maannakkut arlaatigut ajoqusertoqarsimanissaanik misissuigaluarpugut, kisiannili tamanan pillugu suli nalunaaruteqartoqanngilaq, taama Sjællandip avannaani politiit pigaartuusoq oqarpoq.Seismolog, tassa nunap sajuttarneranik ilisimasalik Peter Voss Ritzaumut oqarpoq, nunap sajunnerata kingorna illut innarlersimasinnaasut, ilanngullugu aamma oqaatigaa nunap sajoqqissinnaanissaa ersissutissaqartoqassanngitsoq.

Nunap sajoreernerata kingorna sajuallassinnaanerit annikitsuinnarmik pisinnaasut, tamannali annikingaarmat malugineqarsinnaanavianngitsoq, Seismolog, tassa nunap sajuttarneranik ilisimasalik Peter Voss oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq