Danmarkimi tunillatsissimasutut paasineqartut nutaat 453-it coronavirusip Danmarkimi tuniluutileqqaarneraniit aatsaat taama amerlatigisut ullormi ataatsimi paasineqarput.Assi: Scanpix

Danmarkimi tunillatsissimasutut paasineqartut 453-iullutik aatsaat taama amerlatigisut

Danmarkimi tunillatsissimasut nutaat ullormi ataatsimi paasineqartut 453-iupput aatsaallu taama amerlatigisunik tunillatsittoqartoq, Statens Serum Institutimit kisitsisit takutippaat.

Danmarkimi coronavirusimik tunillatsissimasutut uppernarsarneqartut ullut marluk kingulliit 822-upput. Tamanna Statens Serum Institutimit kisitsisit takutippaat.

Kisitsisit teknikkikkut pissuteqarteqartumik pingasunngornermi nutarterneqanngillat.

Ullormi ataatsimi kingullermi tunillatsissimasutut paasineqartut 453-iupput. Ullup ataatsip siuliani 369-iupput.

Tunillatsissimasutut uppernarsarneqartut nutaat 453-it coronavirusip Danmarkimi tuniluutileqqaarneraniilli aatsaat taama amerlatigisut nalunaarsorneqarput.

- Tunillaassuuttoqarnera qaffasillunilu annilaarnarpoq. Tunillatsissimasut 400-init amerlanerunerat ilorraap tungaanut ingerlanerunngilaq, Lungeforeningenimi siulittaasoq, Torben Mogensen oqarpoq.

Killilersuinerit nutaat

Illoqarfiit pingaarnersaani tunillatsittut amerliartorneruffianni corona pissutigalugu killilersuinernik nutaanik sisamanngormat atulersitsisoqarpoq.

Killilersuinerit nutaat Aarhusimi aggustimi tunillaassuuttoqarnerani atulersinneqartunut assingupput. Torben Mogensenilli oqarnera naapertorlugu Aarhusimi pissutsit Københavnimi pissutsinut naleqqiunneqarsinnaanngillat.

AAMMA ATUARUK Danmarkimi coronamik tunillatsissimasut apriilimili aatsaat taama amerlatigisut

- Aarhusimi somaliamiut akornanni universitetimilu aallartittoqarnerata nalaani tunillaassuuttoqarneruvoq. Taakku Københavnimi tunillatsittut siammasissumik amerliartorneranit ajornannginnerupput. Neriulluarpallaanngilanga, Torben Mogensen oqarpoq, killilersuinerillu nutaat sunniutaat ullut qulit 14-illu ingerlanerini aatsaat takusinnaalissagipput erseqqissaatigalugu.

Tunillatsittut nutaat kingullermik apriilip ulluisa arfineq-pingajuanni amerlanerpaapput, tassani tunillatsissimasut 408-t uppernarsarneqarput.

60-it napparsimmavimmi uninngasut

Tunillatsissimasutut uppernarsarneqartut amerlanerpaanngornerat coronavirusimut misissortittut upernaamit ullumikkut amerlanerungaatsiarnerannik pissuteqarpoq. Taamaammat uppernarsarneqartut aamma amerlanerupput.

AAMMA ATUARUK Danmarkimi tunillatsissimasut amerliartoraluartut malittarisassagut tunillatsissimasunik nunatsinnut isitsaaliisut

Napparsimmavimmi uninngasut sisamanngornermi 60-iupput. Taakku marlunngornermi nalunaarsuinermit tallimanik amerlanerupput. Uninngasunit sisamat peruluttut uninngavianniipput ataaserlu anersaartuuteqartinneqarluni.

Marlunngornermi nalunaarsuisoqarnerata kingornatigut marluk allat coronavirusumik toqquteqarput. Taamaalilluni Danmarkimi coronavirusimik toqquteqartutut uppernarsarneqartut katillugit 635-ulerlutik.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 10353
  Tunillanneqarsimasut
17
  Peqqisseqqittutut nalunaarutigineqartut 16
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Takuuk: nun.gl Nunatsinni Nakorsaaneqarfik
  Nutarterneqarpoq
  oktobarip 23-at 2020 nal. 10:45