Assi: KNR

Danmarkimi tunillatsissimasut amerliartoraluartut malittarisassagut tunillatsissimasunik nunatsinnut isitsaaliisut

Danmarkimi tunillatsittut amerliartornerat ilutigalugu coronavirusip nunatsinnut eqqunneqaqqissinnaanera ilimanarnerusoq, nakorsaaneq naliliivoq.

Danmarkimi coronavirusimik tunillatsissimasutut uppernarsarneqartut ataasinngornermi 243-put.

Tamanna apriilip naaneraniilli aatsaat taama qaffasitsigaaq. Tamannalu nunatsinnut kinguneqarsinnaasoq, nakorsaanerup, Henrik L. Hansenip oqaatigaa.

- Maannakkut Danmarkimi tunillatsittut amerliartuinnarnerat ilutigalugu nunatsinnut tunillatsissimasumik isertoqaqqissinnaanerata ilimanarnera qaffakkiartorpoq. Taamaammat tunillatsissimasumik isertoqaqqinnissaata ilimanassusaa kisitsisitigut qaffakkiartussaaq, nakorsaaneq oqarpoq.

- Danmarkimili tunillatsissimasoqassusaa suli appasippoq, kisianni qanoq ineriartortoqarnera qanimut malinnaaffigaarput, nakorsaaneq nangilluni oqarpoq.

Danmarkimili tunillatsittut amerlinerat upernaaq misissortissimasunit amerlanerungaatsiartut misissortittarnerannut atassuteqarpoq.

Nakorsaaneq naliliivoq: Maani ingerlalluartoqarpoq

Naalakkersuisut nunarput avataaneersunut tikittartunut malittarisassanik qasukkaaneranit qaammatit marluk missaat qaangiupput.

Ingerlalluartoqarsimavorlu. Nakorsaanerullu oqarnera naapertorlugu ingerlalluartoqangaatsiarpoq, nunatsinnummi timmisartukkut tikittunit coronavirusimik eqqussisoqarsimanngilaq.

Nunatsinnut angalaniartut timmisartorsuarmut ikinissaminnut coronamik tunillatsissimannginnermut uppernarsaammik annerpaamik ullunik tallimanik pisoqaassusilimmik takutitseqqaartussaapput. Taakkulu tikikkunik siornatigutulli angerlarsimaffimminnit aninaveersaartariaqaratik.

Pisariaqassappalli oqartussat killilersuinernik atulersitseqqissinnaasut, nakorsaanerup erseqqissaatigaa. Maannali taamaaliuliivittoqanngitsoq, nakorsaaneq naliliivoq.

- Nunatsinnut angalasunut tunngatillugu allannguinissamut maanna pilersaaruteqartoqanngilaq, Henrik L. Hansen KNR-imut oqarpoq.

AAMMA ATUARUK Nakorsaaneq: Nunatta tamarmi matuneqarnissaa pinaveersaartissavarput

Apeqqut: Nunatsinnut angalasunut nutaanik killilersuisoqarnissaanut innersuussinissassinnut susoqaqqaassava?

- Danmarkimi tunillatsittut ima amerlatigilerunik allaat tunillatsissimasumik nunatsinnut isertoqarnissaa ”ilimanarluinnartutut” nalilersimassavarput, nakorsaaneq oqarpoq.

Henrik L. Hansenilli ”ilimanarluinnartoq” qanoq annertuginersoq itinerusumik oqaatigerusunngilaa. Tamanna Danmarkimi tunillatsittut sumiiffinni aalajangersimasumiinnaanersoq imaluunniit ataatsimoortumiinersoq apeqqutaavoq.

Nakorsaanerup nunatsinnut tikittartut Danmarkimit sumiiffinnit assigiinngitsuneerlutik sumiiffimmit ataasiinnarmeertuuneq ajortut oqaatigaa.

AAMMA ATUARUK Tamaat isigalugu: Coronavirus pillugu killiffik

Pisariaqalissappalli oqartussat assigiinngitsunik siunnersuutinik, Naalakkersuisut atoqqilersinnaasaannik peqartoq nakorsaanerup erseqqissaatigaa.

- Nunatsinnut angalasunut toqqaanartumik killilersuisoqarsinnaassaaq, kikkut qanorlu amerlatigisut nunatsinnukarnissaannut killilersuisoqalersinnaavvoq.

- Aamma nunatsinnut isertunut nakkutiginninneq sakkortusineqarsinnaavoq, assersuutigalugu mattusimasoqarnissaanik atuutsitsilernikkut, Henrik L. Hansen oqarpoq.

Nakorsaanerulli suliniut suut atulersinneqasssanersut aalajangertussaanngilaa. Taanna – nakorsaaneqarfimmiittut allat peqatigalugit – peqqinnissamut atatillugu naliliisaræutillu innersuussuteqartarput.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 9935
  Tunillanneqarsimasut 16
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  oktobarip 19-iat 2020 nal. 10:45