Danmarkimi taasisitsinissaq pinngitsoortinniarpaat

Tyskit maanna EU-mi siulittaasuutitaqartut, EU-p tunngaviusumik inatsisissaattut isumaqatigiissutip taartissaa pillugu Danmarkimi taasisitsisoqarnissaa pinngitsoortinniarlugu sulileruttorput. Tamanna Tyskit EU-p qullersaasa ataatsimiinnissaannut, aqagu ualikkut aallartittussamut, oqallissaarutaanni isertuussami takuneqarsinnaavoq.

EU-mi qullersat taasisitsinissaq ernumanartoqartippaat, tassa Franskit Hollandimiullu taasinermikkut itigartitsereersullu. Tyskit maanna EU-mi siulittaasuutitaqartut tunngaviusumik inatsisissatut siunnersuutip, soorlu Danmarkimi taasisitsissutigineqarnissaa pinngitsoortinnialerpaat, tamatumani inatsisit tunngaviginiarneqarlutik.

EU-mi qullersat ataatsimiinnissaat sioqqullugu pisinnaatitsisoqarnissaanik isumaliutissiissut pineqarpoq. Matumani pineqarluni nunat ataasiakkaat naalakkersuisuisa inatsisilerituuisa isumaqatigiissutissatut siunnersuut ukiamut naammassillugu suliarissagaat.

Danmarkimi inatsisinik atortitsinermut ministereqarfik naapertorlugu EU-mi tunngaviusutut inatsisissatut siunnersuut nutaaq immikkoortunik qulingiluanik Danmarkimi tunngaviusumik inatsimmi paragraf 20-mut naapertuutinngitsunik imaqarpoq, tassa naalagaaffiup allanut atanani imminut naalakkersorneranut tunngasunik. Immikkoortut qulingiluat taakkua allanngortitassatut allanneqarsimapput, tyskillu naapertorlugit peerneqarnissaat siunnerfiuvoq.

Kisianni inatsisit tunngaviginagit, naalakkersuinikkulli tunngaveqarluni taasisitsisoqarsinnaanera takorloorneqarsinnaavoq. Tassa tamanna pisinnaalluni Folketingimi amerlanerussuteqartut tamanna aalajangiuppassuk. Maannami EU-mi qullersat ataatsimeereerpata ministeriunerup suniarnerminik avammut nalunaaruteqarnissaa ilimanarmat.