Danmarkimi sungiusarneq iluatsilluartoq
Kalaallit assammik arsarlutik nunanut allanut unammisartui Danmarkimut sungiusariartoreerlutik maanna angerlariartulerput. Sungiusarnerup siunertaraa, NORCA-mut angunniulluni unammiuaarnissat Puerto Ricomi marsimi ingerlanneqartussat sioqqullugit ataqatigiillualernissaq. Nunatsinniit Danmarkimiillu nunanut allanut unammisartut akornanni qiimasoqarlunilu nuannariittoqarpoq, nunanut allanut unammisartut sungiusaasuat, Johannes Groth oqarpoq.
Nunanut allanut unammisartut Odder Håndbold 2. divisionsimiittut, divisionimi maannakkut pikkorinnerit pingajuanniittut unammivaat, kalaallillu assammik arsartartut unamminermi ajugaapput.
- Unamminermi ingerlalluarput, unammineq tamaat siuarsimavugut. Isumagissaarneq arsaaffimmi sunniuteqarpoq, Johannes Groth KNR-imut oqarpoq.
Pitsaassutsimik sungiusarneq
NORCA-mi unammiaarnermi nunat tallimat peqataassapput, taakkuni pitsaanerpaat pingasut Canadami Torontomi pisussami Pan Amerikanske Mesterskabereqarnerani juulimi ukioq manna peqataassapput.
- Pitsaanerpaat pingajuanniinnissarput taamaalillutalu Pan AM-imi peqataanissarput qulakkiissallugu anguniarparput, nunanut allanut unammisartunut sungiusaasoq oqarpoq.
- Arsaaffimmi arsalerinermi kukkusarnerput ukiuni marlunni kingullerni ukkataringaatsiarparput. Arsalerinermi maanna pikkorinnerulernikuugatta pitsaassutsimik arsariaaseq sungiusarparput, Johannes Groth oqarpoq.
Mexico, USA, Puerto Rico Nunarpullu pitsaanerit pingajuaniinnissaat piukkunneqarnerpaavoq. Unammisartut pingasut taakku Nunatta siusinnerusukkut unamminikuuai. Unamminernilu ajorsarfigalugillu ajugaaffiginikuuaat.
Unammisartut inissatik qulakkeernikuunngilaat
Nunanut allanut unammisartussatut piukkunneqartut 35-upput taakkunanngalu 14-it Danmarkimut sungiusariarput, NORCA-milu marsimi unammiuaarnissamut 16-it unammiartoqataasussaapput.
- Unammiartortussanik toqqaavinnginnitsinni periarfissat sukumiisumik misissoqqaassavagut. Nunanut allanut unammisartussatut piukkunneqartunit marluk pingasut Danmarkimut peqataanngitsut unammiartortussavinni ilaasinnaasorujussuupput.
- Unammisartut peqataassanerlutik suli qulakkiinngilaat, tamanna namminneq aamma nalunngilaat, Groth oqarpoq, nangillunilu unamminissamut sumiiffissat unammissutaasut oqaatigaa.
AAMMA ATUARUK Assammik arsarlutik nunanut allanut unammisartut toqqarneqartut
AAMMA ATUARUK Nunanut allanut unammisartut sungiusarnissartik Danmarkimut nuukkaat
