Danmarkimi sumiginnakkat kommunit isiginngitsuusaarpaat
Meeqqat angajoqqaaminnik imerajuttunit persuttartittartut Danmarkimi kommuninit isiginngitsuusaarneqakkajuttarput, Danmarkimi meeqqanik ikiuiniaqatigiiffiit taama avoqqaarinnipput.
Danmarkimi meeqqanik ikiuiniaqatigiiffinnut Red Barnetimut aamma Børns Vilkårimut ukiup affaata kingulliup ingerlanerani meeqqat sumiginnakkat 1000-t sinnerlugit saaffiginnissutigineqartarput. Danmarkimi kommunit meeqqanik najugaqarfigineqartut ataasinnguamilluunniit ikiorsiiniarsimanngillat, saaffiginnissutaasartullu amerliartortut suliniaqatigiiffinnit aamma nalunaarutigineqarpoq.
Danmarkimi illoqarfeeqqami Tønderimi niviarsiaqqap kinguaassiutaanik atornerluisut arlallit paasineqarmatali Danmarkimi meeqqat atugarisaat kikkunnit tamanit eqqartorneqalerput.
- Taamatut eqqartuineq sumut iluaqutaassarpa kommunit namminneq meerartamik atugarisaannik oqilisaarusunngippata. Aamma inuit susoqarnersoq nalunngikkaluarlugu oqarnaveersaartarput ajornerpaaffissaa tikitserlugulusooq, Peter Albæk oqarpoq.
- Ajuusaarnaraluaqaaq meeqqat ilanngui artornartunik atugaqartarmata, taamaattoqartillugu artornaraluartulluunniit akuleruffigissallugit pikkorinnerusiariaqarpugut, Danmarkimi kommunit kattuffiianni isumaginninnermut ataatsimiititaliami siulittaasoq Tove Larsen oqarpoq.
Danmarkimi isumaginninnermut naalakkersuisoqarfimmit kommunit siorna pinngitsaalillugit meeqqanik ikiuinasuartussanik pilersiteqquneqarput. Kommunit nalunaarusiaat Danmarkimi isumaginninnermut naalakkersuisup Eva Kjær Hansenip ukiaru tigussagavaa.
