Danmarkimi sulisartoqarneq pillugu iluarsartuussisoqassanngilaq
Sulisartoqarneq pillugu isumalioqatigiissitap nalunaarusiarsuartik, iluarsartuusseqqinnissanik arlalinnik siunnersuuteqarfiusoq, aqagu saqqummiuttussanngoraallu ministeri taama oqarpoq. Ilaatigut siunnersuutigineqartut ilagaat, ullormusiaqartitsisarnerup sivikillineqarnissaa aamma soraarnerussutisiassanik katersinermut akiliutigineqartartup qaffanneqarnissaa.
- Suliffissaarusimasut amerliartuleruttornerat ajornartorsiutigileruttoripput soraarnerussutisianut ullormusiaqartitsinermullu tunngasut allanngortinnianngilavut, ministeri oqarpoq. Tamanna Danmarkimi sulisartoqarnikkut kattuffinnit nuannaarutigineqarpoq. 3F-ip siulittaasuata Povl Erik Skov Christensen ima oqarpoq:
- Taamatut aalajangertoqarnera nuannaarutissaavoq, tamatumuunami nassuerutigineqarmat isumalioqatigiissitap pilersinneqarneranit Danmarkimi pissutsit sulisartoqarnikkullu pissutsit maanna allanngorluinnarsimasut, 3F-ip siulittaasua oqarpoq.
Naak siunnersuut maanna taamaatinneqaraluartoq, 3F-ip siulittaasuata taamaatinneqavissutut isiginngilaa.
- Isumalioqatigiissitap apeqqutit tikitai assigiinngitsunut tunngatillugu piffissami aggersumi tikinneqartarumaarput. Sulisartut kattuffiiniit ilimagaarput isumalioqatigiissitap saqqummiussai ukioq ataaseq marlulluunniit qaangiuppata oqallisigineqaqqilerumaartut, Povl Erik Christensen oqarpoq.