Danmarkimi sulinngiffeqarneq kalaalerpaluttortarpassualik
Nunarput Danmarkimi ulluni makkunani soqutigineqaqaaq - tassami ukiuunerani feeriarnermi suut sammineqarsinnaanersut Danmarkimi ulluni makkunani sammineqarpoq. Sammisaqartitsineq Aarhusimi, Odensemi, Københavnimi allaallumi Ringkøbingimi pivoq.
Allagartarsuit, plakaatit, Kalaallit Nunaannut tunngasunik assiliartallit Aarhusimi Den Gamle By-mi ullumikkumiit saqqummersinneqarput. Plakaatit isiginnaartitsinermut, politikkimut takornariaqarnermullu tunngassuteqartut 250-it missaat allagartarsuarnut katersugaasivimmi, Den Gamle By-miittumi, pisortap ukiuni arlalinni katersorsimavai.
Katersugaasivimmi tassani, kalaallit immikkut sammineqarput. Meeqqat tupilaliorlutillu ajagaliorsinnaapput, aamma sapakkerisinnaallutik. Qallunaat nunatsinni ilisimasassarsiortarnerat, kalaallit oqaluttuaatitoqaat anersaanillu oqaluttuat, "atsap" Ingrid Dahlip aamma oqaluttuarisarpai.
Qimmit qiluppaluat Odensemi Uumasuusivissuarmi sapaatip-akunnerata naanerani tusaaneqarsinnaassaaq, takuneqarsinnaasunullu ilaallutik tupilaat, aamma aalisakkat panertut sassaalliutigineqassallutik. Uumasuusivissuup kalaalerpaluttumik aaqqissuussinissaa Odensemi Kalaallit Illuutaat ikiortigalugu iluatsippoq - soorlu qimussertoqarsinnaassaaq, qaannanik takutitsisoqarluni, saanernik allanillu sanaluttoqarluni kalaaliminernillu assigiinngitsunik misiligaasoqarsinnaavoq.
Ringkøbingimi Katersugaasivimmi qallunaat Tunup Avannaarsuanut ilisimasassarsiornerat meeqqanut inuusuttunullu sammitinneqassaaq. Ilisimasassarsiornermut ulorianarsinnaasumut peqataassagunik sunik nassassanerlutik oqaluttuarisassavaat, uumasullu eqqumiitsut oqaluttuaatoqaatitsinneersut Isiginnaartitsivissuarmi Teatret Om-imik taaguutilimmi saqqummersinneqassapput.
Københavnimi Katersugaasivissuarmi ukiuni saviminernik sakkoqalernerup nalaani inuuneq ullormi ataatsimi misilinneqarsinnaavoq, itsarsuarnitsanik ilisimatuut Kujataa pillugu ilaatigut oqalugiartut tusarnaarneqarsinnaallutik.
