Danmarkimi soraarnerussutisiallit nunatsinni atuutiinnarnissaat siunnersuutigineqarpoq

Danmarkimi kalaallit danskillu pisortanit soraarnerussutisiallit nunatsinnut nuunnerminni soraarnerussutisiaminnik annaasaqartarnerat allanngortittariaqartoq, Dansk Folkeparti isumaqarpoq.

Danmarkimi pisortanit soraarnerussutisiarisartakkat nunatsinnut naleqqiullugit qaffasinnerupput, Danmarkimiillu nunatsinnut nuuttartut Danmarkimi pisartakkatik annaasarpaat, nunatsinnilu appasinnerusumik soraarnerussutisiaqalersarlutik.

Taamaattumik Danmarkimi pisortanit soraarnerussutisiarisartakkat pigiinnarlugit nunatsinnut nuuttoqarsinnaanera anguneqartariaqartoq Dansk Folkeparti isumaqarpoq.

Kalaallit Danmarkimi ukiorpassuarni najugaqarsimasut nunatsinnut utoqqalinersiaqarlutik angerlarusukkaluartut nunatsinni soraarnerussutisiat appasinnerunerat pissutigalugu uniinnartartut Dansk Folkeparti isumaqarpoq, taamaattariaqanngikkaluarnerarlugulu. Taamaattumik isumaqarput, Danmarkimi pisortanit soraarnerussutisiaqalernissamut pisinnaatitaaffillit sumulluunnit nuukkaluarunik pisartakkatik pigiinnartariaqaraluaraat, aamma naalagaaffeqatigiinnerup iluani.

Danmarkimi pisortanit soraarnerussutisiaqalersimasut pisartakkatik pigiinnarlugit nunanut allanut nuussinnaatitaareerput, tamannali naalagaaffeqatigiinnerup iluani atorneqarnani.