Danmarkimi sapaatit-akunnerini marlunni sisamassaa coronamik toqquteqartoqanngitsoq

Danmarkimi coronavirusimik akunnerit 24-t kingulliit ingerlaneranni toqquteqartoqanngilaq.

Statens Serum Institutip kisitsisaataasa kingulliit tamanna ullumi marlunngornermi takutippaat.

Inuit 563-it coronavirusimik Danmarkimi maannamut toqquteqarsimapput, coronavirusimmillu sapaatip-akunneri marluk kingulliit ingerlaneranni sisamassaa akunnerit 24-t ingerlaneranni toqquteqartoqarani.

AAMMA ATUARUK Marsimili siullerpaamik: Danmarkimi coronavirusimik toqquteqartoqanngitsoq

Inuit napparsimmavinni uninngasut aamma ikiliartorput maanna 112-iullutik. Marsip ulluisa 17-ianniilli aatsaat taama ikitsigalutik. 112-it akornanni 23-t peruluttut inaanni uninngapput.

14-it anersaartuutilerneqarsimapput, marsillu ulluisa 17-ianniilli aatsaat taama ikitsigalutik.

Inuit coronavirusimik tunillanneqarsimasut 41-nik amerlipput, coronavirusimik Danmarkimi tunillanneqarsimasut katillutik 11.428-ullutik.

Taakkunannga 10.044-t peqqissisimapput.

Nunap immikkoortua Region Hovedstaden Region Sjællandilu eqqorneqarnerpaapput, Store Bæltimiillu kimmut napparsimmavinni uninngasut 30-nit ikinnerullutik.