Danmarkimi sangiinnerusunut sisamassaanik akiuussusersuisoqangajalersoq
Danmarkimi peqqinnissamut oqartussat inunnut sanngiinnerusunut coronavirusimut akiuussutissamik sisamassaanik kapisinissamik neqerooruteqarniarput.
Peqqinnissamut ministeri Magnus Heunicke tusagassiortunik pingasunngornermi katersortitsinermi taama paasissutissiivoq.
Danmarkimi najugaqartut 55 procentiisa akiuussutissamik pingajussaanik kapitereersimalersullu sisamassaanik kapisinissamik pilersaartoqalerpoq.
Inuit gigtertut inuillu timimik illersuutaanik sanngiillisoorsimaasut sisamassaanik maannamut akiuussutsimik neqeroorfigineqareerput.
Taakkua timiisa illersuutissaat coronavirusip tuniluunnerani pitsaanerulertinniarlugit taama neqerooruteqartoqarpoq.
Immaqa aamma utoqqaanerpaanut
Sisamassaannilli kapitinnissaq inunnut amerlanernut sapaatit akunnerata naanerani tulliataluunniit aallartinnerani neqeroorutigineqalissasoq Danmarkimi peqqinnissamut aqutsisoqarfimmi pisortaq Søren Brostrøm nassuiaavoq.
- Sanngiinnerpaatavut ukkatarineqarput. Kræftimik napparsimasut, timip illersuutaanik nakorsarneqartut timillu illersuutaatigut nappaateqartut ukkatarineqarput, taanna oqarpoq.
Utoqqaat angerlarsimaffiini najugalinnut utoqqarnullu sisamassaanik kapisinissamik oqartussat isumaliutersuuteqartut ilanngullugu oqarpoq.