Danmarkimi qinersisoqassanersoq pissanngatigineqarpoq

Partiit talerperliunerusut saamerliunerusullu ministeriuneq Anders Fogh Rasmussen qinersisoqarnissaanik kajumissaarpaat.
oktobarip 24-at 2007 06:45

Nunanut allanut ministerip Per Stig Møllerip Indiami angalanini taamaatiinnarlugu Københavnimut tuaviinnaq ullumikkut utertariaqalerpoq.

Folketingimut Kalaallit Nunaanniit ilaasortaatitarput, Kuupik Kleist, IA, nalunaaquttap akunnerata affaata matuma siorna Radioavisimut oqaluttuarpoq, Christiansborgimut anngukkami, Socialdemokratit ilaannit aperineqarsimalluni qinersisoqarnissaannut piareersimanersoq.

Kuupik Kleistili soorunami piareersimanngilaq, taannami qinigassanngorteqqinnianngilaq. Ernumagisatuaa tassaalerpoq Namminersornermi pillugu Ataatsimiititaliarsuaq maanna qinersisoqassappat qanoq pissava?

Qinersisoqassappat tamanna Danmarkimi nalunaaqutaq malillugu nalunaaqutaq ataatsimut aalajangerneqassaaq, uagut nalunaaqutarput malillugu nalunaaqutaq qulingiluanut.

Ilanngutassiortorput Rosa Thorsen oqarpoq, qinersisoqassanersoq nalunaaqutaq qulingiluanut paasinarsissasoq. Qinersisoqassappallu novembarip ulluisa 13-ianni qinersisoqassaaq.