Danmarkimi qinersisoqartuuppat

Ullumikkut folketingimut qinersisoqartuuppat Danmarkimi Socialdemokratit ajorsassagaluarput, Radikale Venstrellu siuariaqqissagaluarlutik.

Socialdemokratit 22,5 procentinit qinerneqassagaluarput, ukiut 49-t matuma siornatigut Gallup-i qinersisartunik isumasiuisalermalli, Socialdemokratit tapersersornikinnerpaanerisa pingajoralugu. Aviisi ullormut saqqummersartoq Berlingske Tidende ullumi taama allappoq.

Partii De Radikale Venstre 11,3 procentinit qinerneqarluni 20-nik folketingimut isertitaqassagaluarpoq, partiillu annersaasa sisamarilersimassagaluarlugu, Konservativet qaangerlugit.

Februaarimi isumasiuinermut naleqqiullugu partii naalakkersuisuutitalik Venstre 0,1 procentimik kinguariaallappoq, siornalu qinersinermut sanilliullugu 1,6 procentinik kinguarluni.

Aviisip Jyllands-Postenip muuamaamik titartakkat saqqummersimmagilli, kingornalu muuamaakkormiunit akerlilersorneqalermalli, naalakkersuisuutitallit Venstre-t aamma Konservativet tapersersortaat Dansk Folkeparti siuariartortuarsimavoq. Dansk Folkeparti tunuliaqutaralugu partiit talerperliit 95-inik Folketingimi ilaasortaatitaqalissagaluarput, illua’tungiliuttullu 80-inik ilaasortaatitaqalersimassagaluarlutik.