Danmarkimi qineqqusaartoqarnerani kalaallit eqqaaneqarpianngillat
Københavnip Kommuneani qineqqusaartut ilagaat Kalaallit Illutaata Københavnimiittup siulersuisuisuni siulittaasoq Taner Yilmaz (S).
- Kalaallit Nunaat oqallisigineqartupilussuusimavoq, oqallinnerli Kalaallit Nunaannut tunngavoq kalaallillu Danmarkimiittut eqqaaneqarpiassanatik.
Kalaallilli oqallinnermi sammineqannginneri ajortuinnaanngilaq, isumaginninnikkummi ikiortariallit kisiisa samminiarneqalersoorneqartarmata, oqarpoq:
- Isumaginninnikkut ikiortariallit pillugit oqallittoqaleraangat, kalaallit Danmarkimiittut sanngiitsutut taaneqartoorsinnaasarput. Kalaallit ingerlalluartut nukissaqarluartullu sammineqanngisaannarput. Taamaammat kalaallit Danmarkimiittut tamaasa sanngiitsutut eqqartorneqalersoortarput, pingaatumik Københavnimut tunngatillugu.
Aaqqissuisoqarfiup ilisimasai naapertorlugit Nunatsinneersunik qinigassanngortittoqarsimanngilaq. Københavnimili qinersisartut Nunatsinneersut 2000-ingajaapput Taner Yilmaz oqarpoq.
- Taakku amerlasuupilussuupput. Taakku katersorsinnarlugit qinigassanngortittumik kalaallinut tunngasunik soqutigisalimmik qinersisinnaasuuppata kommunimut isertitsisoqarsinnaagaluarpoq. Isumagali malillugu siaruarsimasuupput, qinersisartullu katersuuffissaqaratik, oqarpoq.
Qinigassanngortittut kalaallinik immikkut isiginiagaqartut ikitsuinnaasut ilagaat Tommy Petersen, de Radikalet sinnerlugit Københavnimi qinigassanngortittoq. Taanna Kalaallit Illutaanni kalaallit pillugit qinersisartunik ataatsimiisitsinissamik aaqqissuusseqataavoq, kingullertigullu aamma Anda Uldum Demokraatineersoq suleqatigalugu Nuup Københavnillu qaninnerusumik suleqatigiittoqarnissaanik siunnersuuteqarpoq, kalaallit Danmarkimut nuuttut nutaamik inuuneqalernerminni oqinnerusumik aallartitsinissaat anguniarlugu.
- Kalaallit Danmarkimut imaluunniit Københavnimut nuuttut pisariinnerusumik sulinneqartarnissaat kissaatigaarput, soorlu nalunaarsoneqarnissaminnut napparsimalersinnaanermullu sillimmasigaanermut allagartamik tunineqarnissaminnut, taamaaliornikkut maani inuunertik nutaaq aallartilluarniassagamikkut. Anda Uldumip oqaluttuuppaanga, napparsimalersinnaanermut sillimmasigaanermut allagartamik tunineqarnissamik qaammatit marlunni ilaatigut utaqqisoqarsinnaasatoq. Tamakku suliarineqartaneri Danmarkimut aallannginnermi aallartisarneqarsinnaasuuppata kalaallinut maanga nuuttunut iluaqutaassagaluarpoq.
