Danmarkimi pinngortitaleriffimmi Skov- og Naturstyrelse-mi annilaangassutigineqalerpoq, puisit toqussutigisartagaat, sælpest, Danmarkip ilaani qeqertami Anholtimi atugaalersoralugu.
Anholtimi puisit ukiumut 30-t missaanniittut toqungallutik sissamut tipisimasut siumorneqartarput maannali qasigiaqqat 25-t ullualunnguaannaat ingerlaneranni toqungasut nassaarineqarput.
Qasigiaq Danmarkimi puisini nalinginnaanersaavoq.
Pinngortitamik nakkutilliisoq Morten Abildstrøm Ritzauip nutaarsiassaqartitsivianut oqaluttuarpoq, aatsaat taama amerlatigisunik piffissap sivikitsuinnaap iluani puiseeqqanik toqungasunik nassaarlutik.
- Qasigiaqqat siusinaarlutik piaqqiat ukiut tamaasa siumortarpavut, maannali 25-nngoreernerat eqqumiiginarpoq, taamaattumik ilimatsaapparput, sælpestimik nappaalalersoqartoq, Uumasut nujuartat pillugit siunnersorti Steen Bonne Rasmussen oqarpoq.
Ilumut virusi phocine distemper puisit toqqutigisimaneraat Aarhus Universitetimi ilisimatuunit maanna misissorneqalerpoq.