Danmarkimi politikerit nuimanerit ilaat: Aleqa tunngavissaqanngitsumik imminut isigivoq
Venstrep Kalaallit Nunaannut tunngasunut oqaaseqartartuata aammalu suliffeqarnermut aningaasaqarnermullu ministeriusimasup, Aleqa Hammondip siunissaq pillugu isiginnittaaseqarnera isumaqatiginngilaa. Allaammi Naalakkersuisut siulittaasuat tunngavissaqanngitsumik imminut isigisuunerarpaa.
- Kalaallit Nunaanni oqallinnerup ilaa tusarnaaraanni - minnerunngitsumik Aleqa Hammondi - oqallinnerup tunngavissaqanngitsumik takorluugaqarluni ingerlanneqarnera malunnarpoq, Claus Hjort Frederiksen Berlingske Tidendemut oqarpoq.
Hjorth Frederiksen tassaavoq Foghip politikkianik ilusilersuisuusimasoq, Foghip kingoraartaata Lars Løkke Rasmussenip aqutsinerata ataani saassussisoqassagaangat siuttorineqartartoq Løkke Rasmussenilu saassunneqaraangat tamakkununnga akissuteqartussatut inissisimasartoq.
- Aleqa Hammondip oqaatigisartagai tupigusuutigisarpakka. Allaannginnami takorluuinerinnarmik tunngaveqarluni politikkeqartoq, takorluukkallu piviusorsiunngitsullu kisiisa tunngavigalugit suliniarneq nunamut sumulluunniit peqqinnartuunngilaq. Taamaammat periarfissat pillugit nassuiaammik maanna pissarsisimanerput nalituupilussuuvoq, Claus Hjort Frederiksen oqarpoq.