Danmarkimi pisanik eqqaavallaarunnaassapput
Aalisartut qanoq pisaqartiginertik tunngavigalugu, massakkutut tulaassaat qanoq amerlatiginersut aallaaviginagu pisassinneqartalernissaat siunnersuummi pineqarpoq. Taamaaliornikkut aalisakkanik eqqaaginnartarneq iliuuseqarfiginiarneqarpoq, tassami aalisartut pisamik ilarpassui igiinnartarmatigik, aalisakkat anginerusut aalisakkanit minnerusunit akigissaarnerusarnerat pissutigalugu.
Danmarkimi inuussutissalerinermut ministerip Henrik Høeghip oqaatigaa, siunnersuut nunanit arlalinnit tapersersorneqartoq.
- Aalisagartassiisarnermut tunngasunik Danmarkimi misilittagaqarluarpugut, aalisartullu aalisakkanik minnerusunik pisaqannginnissartik pikkoriffiginerulerpaat. Taamatut pitsaasumik misilittagaqarnerput Østersømi aalisartunut tamanut siammartikkusupparput, tamannalu maanna ingerlateqqissinnaanngorlugu, Henrik Høegh oqarpoq.
Taassuma Danmark 2012-imi EU-mi siulittaasuutitaqalerpat aalajangiisoqarnissaa neriuutigaa.
Danmark aalisariutini assiliivinnik ikkussuinermik misilittagaqareerpoq, tamatumuunakkut aalisartut pisamik ilaannik eqqaaginnartarnerat nakkutigineqarsinnaaniassammat. Taamaaliornikkut aalisartut akissarsiaralugu, pisarneq naapertorlugu tulaassatik tunngavigalugit pisassinneqaratik amerlanerusunik pisassinneqartarput.
