Danmarkimi pingasunngorpamiit suliumajunnaarnersuaqassaaq

Tamanna ernerlaat, erniinnavillutik angerlartitaanerannik kinguneqariaannaavoq allaallu utoqqaat ikiortariallit ilaqutaasa sullittariaqalersinnaagaat, Danmarkip Radioata oqaluttuaraa.

Peqqissaasut, peqqinnissaqarfimmi ikiortit, inunnik isumaginnittoqarfimmi perorsaasut juumuullu 100.000-it akissarsiaqarnerulerumallutik suliumajunnaaqataassapput.

Napparsimmaviillu upalungaarsimanerit atuutilernissaannut piareersarput.

- Assersuutigalugu siffialersinniartut seeqqulersinniartullu suliarineqanngitsoortariaqassapput, nakorsartittussat perulunnerpaat kisiisa sullittussanngussagatsigit, Bisbebjergip napparsimmaviani peqqissaasut pisortaat Anne Trentemøller nassuiaavoq.

Tulleriiaarineq sakkortooq atuutilersinneqassaaq, immikkoortortalli ilaanni malugineqarnavianngilaq, taakkunani upalungaarsimanissami maleruaqqusat malillugit inuttaqareermat, oqarpoq.

Upalungaarsimaneq Danmarkimi peqqinnissaqarfinni atuutilersinneqarpat, nakorsiat utoqqaallu eqqugaanerussapput.

Akissarsiat ukiuni tullerni pingasuni 12,8 procentimit, tassa kommunit peqqinnissaqarfiillu qaffaatissatut neqeroorutaanniit, annerunissaa piviusunngunngippat inulerisut pingasunngorpamiit suliumajunnaassapput.