Nalunaarut: Danmarkimi peqqinnissaqarfik arnanik kalaallinik sullissinermini kinguarsimasoq

Arnat kalaallit Danmarkimi peqqinnissaqarfimmi sullinneqaraangamik assigiinngisitsinermik nalaataqarsinnaasarput.  

Tamanna Inuit Pisinnaatitaaffii pillugit institutip nalunaarusiaani atuarneqarsinnaavoq. Tassani oqaatsitigut kulturikkullu assigiinngissutsit paatsoortitsisinnaanerat assigiinngisitsinermillu kinguneqarsinnaanerat ukkatarineqarpoq.

- Peqqinnissaqarfik arnanik kalaallinik ataatsimulluunniit isigalugu kalaallinik naapitsigaangami ajornartorsiutaasartunik ilisimasaqarnerulertariaqaraluarpoq taamaalillutik ajornartorsiutaasinnaasut sillimaffigineqarsinnaalissapput, Line Vikkelsø Slot Inuit Pisinnaatitaaffii pillugit institutimi siunnersortaaneq nalunaarusioqataasorlu oqarpoq.

Nalunaarummi arnat kalaallit naartunerminni Danmarkimi peqqinnissaqarfimmut nakorsiartut erniartortullu misissorneqarput, taannalu arnat arfineq marluk oqalutsillu arfinillit apersorneqarnerannik tunngaveqarluni.

Line Vikkelsø Slotip oqarnera naapertorlugu, Danmarkimi peqqinnissamut ilinniarfinni kalaallit ukkatarineqarnerusariaqarput.

- Nakorsiartut Danmarkimi nakorsatut, peqqissaasutut ernisussiortutulluunniit nalinginnaasumik naapinneqartartunit arlalitsigut allaanermik pissusillit pineqarput, taanna oqarpoq, nangillunilu:

- Nakorsiartoq amerlanertigut nipaannerusarpoq, arnarlu imaassinnaavoq tunuarsimaarnerusoq piumasaqarnanilu. Taamaalilluni taanna arnanit danskinit taamatulli inissisimallutik nakorsiartunit nakorsiarnerminni pissarsiakinnerussaaq.

 Ilisimaneqarnerulertariaqartoq

Aamma anniarnerit takutinneqartarnerisa assigiinngissuteqarnerat nakorsiarnermi paatsoorneqarsinnaapput.

- Aamma paasineqarpoq, arnat kalaallit ernigaangamik naammagittartorujussuusut. Nipaatsumik anniarsinnaasarsimapput taamaalillutik ernisuttut ernisuttutut immaqa isigineqanngitsoorsinnaasarput, Line Vikkelsø Slot oqarpoq.

Arnaq nallisitsisarluni ernisarfimmukarsimalluni nalunaarusiami oqaluttuarpoq. Ernisarfimmukarnerani arnaq alla danskiusoq anniarluni nilliasoq aamma apuuppoq.

Kalaaleq arnaq naak ernisussiortumut ernisunnerminik oqaraluarluni ernisuttutut isigineqannginnami utaqqeqquneqarsimalluni oqarpoq.

Kingorna misissorneqarami 8 centimeterinik ammareersimavoq, ernineralu aallartereerluni - tamannalu peqqinnissaqarfimmi sulisut tupaatigingaatsiarpaat.

- Danskit isaannit oqaaseqarpallaanngitsutut isiginnittoqarsinnaavoq. Tassa ammasorujussuarmik ersersitsinngitsutut aamma anniarnermik danskisullu oqaluttuarinninngitsoqarsinnaavoq, Line Vikkelsø Slot oqarpoq.

Nalunaarusioqataasup oqarnera naapertorlugu napparsimmaviliartut Danmarkimi sungiusimaneqartunit allaanerusunik takutitsisut pineqarsinnaapput..

Oqaluttuarisaanermi pissaaneqarnikkut pissutsit suli atuuttut

Nunasiaataasimaneq aamma nunatta Danmarkillu akornanni oqaluttuarisaanermi atassuteqarnerat arnat peqqinnissaqarfimmik naapitsineranni suli sunniuteqartartoq, Line Vikkelsø Slot oqarpoq.

Arnat arlallit anaanaalluanngitsutut isigineqarnissartik ernumassutigisarlugu nalunaarusiami oqaatigaat.

Arnaq assersuutigalugu erninermi kingorna nikallungarujussuarsimalluni oqarpoq, taasumali nalunaarusiortoqarnissaa ernumassutigigamiuk tamanna peqqinnissaqarfimmi sulisunut oqaatigerusunngilaa.

- Oqaluttuarisaanermi pissaaneqarnikkut pissutsit uku amerlasuutigut ullumikkut suli atuupput, tamannalu napparsimasup kalaallisut tunuliaqutaqartup danskit peqqinnissaqarfiannik naapitsineranni sunniuteqarsinnaavoq.

- Pissaaneqarnermi assigiinngitsoqarnera danskit peqqinnissaqarfianni sulisut napparsimasunik eqimattanik ukuninnga naapitsinerminni eqqarsaatiginerusariaqarpaat, Line Vikkelsø Slot nassuiaavoq.

Tamatuma saniatigut taassuma oqarnera naapertorlugu oqalutseqarnissamik pisariaqartitsisoqangaatsiarnera eqqarsaatigineqartariaqarpoq.

Nalunaarusiap nakorsiartut kalaallit arlallit naak pisinnaatitaaffigigaluarlugu oqalutsimik noqqaassuteqarnissartik ernumagisaraat takutippaa. Tamanna suliakkersuutaarusunnginnerannik ilaatigut pissuteqartoq, Line Vikkelsø Slot nassuiaavoq.

- Arnap napparsimasorluunniit peqqinnissaqarfimmi sulisoq paasisimanngikkaluarluguluunniit immaqa paasinerartarpaa. Tamanna danskit aaqqissuussaaneranni akornutaarusunnginnermik pissuteqarpoq.

- Suliamik ilinniarsimasut taanna eqqumaffigilinngikkunikku eqimattat uku suliamik ilisimasaqartunik sullinneqarnavianngillat imaluunniit pisinnaatitaaffitsik malillugu sullinneqarnaviarnatik.

Peqqinnissaqarfimmut innersuussutit

Inuit pisinnaatitaaffii pillugit Instituti nalunaarusiaq tunngavigalugu danskit peqqinnissaqarfiannut arlalinnik innersuussusiorpoq.

- Danskit peqqinnissaqarfianni sulisut kulturikkut oqaatsitigullu aporfinnik paasinnissinnaanerunissaat aamma Kalaallit Nunaata Danmarkillu akornanni oqaluttuarisaanermi pissaaneqarnermi pissutsit ilisimasaqarfiginerussagaat kissaatigaarput, Line Vikkelsø Slot oqarpoq.

Peqqinnissaqarfimmi sulisut piginnaasaasa nukittorsarneqarnissaannut aamma oqalutsimik pisariaqartitsinerup pimoorunneqarnerunissaanik qulakkeerinissamut ilaatigut tunngassuteqarpoq.

- Oqalutseqarnissamik pisariaqartitsisoqannginnerata ersarinnginnerani oqalutsimik periarfissiisoqartoqartuaannartariaqarnera eqqumaffigineqartariaqarpoq, taanna naggasiivoq.