Danmarkimi partiit ilaasa kalaallinut Danmarkimi najugalinnut ikiuutit allanngortinniarpaat
Kalaallit Danmarkimi najugallit danskisut aatsaat ima oqalloritsigigunik, ajornartorsiutitaqanngitsumik suliffissarsisinnaallutik, aningaasatigut ikiuutisisarsinnaasariaqarput.
Taama siunnersuuteqarput Socialdemokratit Konservativillu.
Anne Marie Meldgaard, Socialdemokratini nunanut allanut tunngassuteqartunut oqaaseqartartoq, isumaqarpoq, taama oqalunneq taamalu eqqarsaateqalerneq tupinnarpallaanngitsoq:
Taama maanna oqaluttoqalernera nutaarsiassaanngilaq. Kikkulluunniit suliffeqanngitsut ikiuutisiaminnit ilanngaanneqartarput, inuiqatigiinnut akuunissamut piumassuseqanngikkaanni ikiuutisiat allaat piivinneqarsinnaapput, Anne-Marie Melgaard oqarpoq.
Nunasisut qimaasullu taamaallaat danskisut oqallorissuunissaannik piumaffigineqartaraluarput, danskisut passeqaraanni tamanna pisariaqartinneqarsimanngikkaluarluni.
Odense-p Kommuneani kalaallit najugallit pingajorarterutaasa missaat aningaasatigut ikiorserneqartarput. Kalaallit Illuutaata Odensemiittup qanittukkut nalunaarusiaani tamanna takuneqarsinnaavoq.
