Danmarkimi palasimik atorfinitsitsiniarneq sakkortuumik isornartorsiorneqarpoq
- Danskit palasit Kalaallit Nunaanni atorfinitsinneqartartut qissimilaariarsigit. Taakku atorfininnerminnut atatillugu angalanissartik pigisamillu assartornerinut akiliunneqartarput. Assigiinngisitsinertut isigaarput, pissusissamisoorsorinagulu, Kalaallit peqatigiiffiisa kattuffianni, Inuit, siulittaasoq Bitha Metalmann, atorfinitsitsiniarnermi peqataatinneqarsimasoq taama oqarpoq.
Palasi Juanna Platou, ilaquttamini alianartumik toqusoqarnera pissutigalugu Siorapalummut utiinnarsimavoq. Ilaquttanilu inissaminnik ujaasiartorluni siulliulluni Danmarkiliarsimagaluarpoq, maannali Aarhusimi biskoppimut nalunaaruteqarpoq atorfininniarnini unitsiinnarlugu. Henriette Berthelsen, Facebookimi quppernermik 'Kalaallit Ilagiit Danmarkimi/Den grønlandske menighed i Danmark'-mik aqutsisuusoq, isumaqarpoq atorfinitsitsiniarnermi atugassarititaasut taamatut aalajangertoqarneranut peqqutaaqataasut.
- Ilaqutariit alianartumik eqqugaaneranni nukippassuit atorneqartariaqartut paasilluarsinnaavara. Palasissatsinnilli atorfinitsitsiniarnerup taamatut ingerlanneqarnera pissusissamisoorsorinngilara. Atorfininniartoq ajorluinnartumik pineqarpoq.
Aarhusimi biskoppip Kjeld Holmip atorfinitsitsiniarnermi atugassarititaasut peqqutaaqataanerat isumaqatigaa. Taanna Radioaviisimut oqarpoq Ilageeqarnermut Ministeriaqarfimmut saaffiginninniarluni, pigisanik assartuinermut angalanermullu aningaasartuutinik akiliussisoqarnissaanut aningaasaliisoqarnissaa siunertaralugu. Tamannalu pissutigalugu atorfik allagarsiuteqqinneqassanersoq, imaluunniit qinnuteqarsimasut allat 3-4-t oqaloqatigineqassanersut suli erseqqissumik oqaatigineqarsinnaanngitsoq.
KNR-ip Ilageeqarnermut ministeriaqarfik ullumi attaveqarfigaa, tassanngaanniilluni paasissutissiissutigineqarpoq ajornartorsiummut iluarsiissuteqarnissaq tunuarsimaarfigineqanngitsoq.
- Århusimi Biskoppeqarfik palasimik kalaallimik atorfinitsitsisussaasoq. Biskoppeqarfiullu tamatumunnga atatillugu ministeriaqarfimmut paasiniaasimavoq nuunnermut angalanermullu ajunngitsorsiassanut malittarisassat qanoq innersut. Biskoppeqarfimmut paasissutissiissutigaarput ajunngitsorsiassaqartitsinissaq nalinginnaasumik malittarisassanut ilaanngitsoq. Biskoppeqarfiup tungaanit aaqqiissutissamik nassaartoqarnissaa kissaatigineqarpat, kalaallit palasissaata angalanera nuunneralu akilerneqartussanngorlugit, taava soorunami biskoppeqarfik ikiorusupparput, Naligiissitaanermut Ilageeqarnermullu Ministeriaqarfimmi immikkoortortami pisortaq, Steffen Brunes taama oqarpoq.
