Danmarkimi palasi sipaarniutigineqariaannaavoq
Tassami 2010-mut aningaasanut inatsisissatut siunnersuummi atorfiup 2011-mi ukiortaamiit missingersuutinit peerneqarnissaa pilersaarutaavoq, Atugagdliutini taama allaaserinnittoqarpoq.
Palasi Jens Kristian Kleist isumaliutersuutit pillugit ilisimatinneqarpoq, biskoppilu Sofie Petersen Ilageeqarnermut Naalakkersuisumik Mimi Karlsenimik pisoq pillugu ataatsimeeqateqarluni:
- Sipaarniuteqarnissamut siunnersuut naggataagut taamaatiinnarneqassanersoq ilisimanngilara. Misissuinerilli arlallit aallartinneqarput. Allamik oqaasissaqanngilanga, biskoppi Atuagagdliutinut oqarpoq.
Jens Kristian Kleist Danmarkimi kalaallisut oqaasilittut kisiartaalluni palasiuvoq. Kalaallinut Danmarkimiittunut ilageeqarnikkut sullissinerit tamaasa isumagai, soorlu katititsinerit, ilisinerit, kuisitsinerit apersortitsinerillu.
Tamatuma saniatigut suliassat arlalissuit Herstedvesterimi parnaarussanut, Rigshospitalimi uninngasunut kiisalu Kalaallit Napparsimasut Angerlarsimaffianni tarnikkut kiffartuussinerit suliarineqartarput.
- Taavalu aamma kalaallit utoqqaat utertut oqaloqatigisarpakka. Qallunaat oqaasii puigorsimavaat, kalaallit oqaasii kisiisa eqqaamallugit, Jens Kristian Kleist naggasiivoq.
