Danmarkimi oqartussat pakatsissutigai

Bertel Haarder, Nunani avannarlernut tunngasuni ministeri, saqqummilaaginnariarluni ataatsimeersuarnermit qimaguteqqimmat, oqallinneq tikikkatsigu apeqquteqarsinnaasimanngilagut, tamanna assut isorinarpoq, Juliane Henningsen oqarpoq.

Apeqqutit akitikkusutani ilaatigut makkuunerarpai:

- Inuk qitiutillugu issittumi siunnersuisoqatigiinni suliniarneq qanoq-una imalik?

- Nunap inoqqaavisut uagut qanoq peqataatinneqarniarpugut.

- Nordpolilerngusaannaq (qalasersualerngusaanneq) qanoq pineqarniarpa?

- Danskit oqaasii imaani sillimaniarnermut tunngasuni qanoq-una pilersaaruteqartoqartoq?

- Ilulissaniit nalunaarut (Ilulissat erklæring) tassani apeqqummi qanoq isumaqarpa?

- Danmarkip issittumi ilisimatusartutut siuttuunera suliassani ataatsimoorussassani qanoq uatsinnut pituttuiva?

- Inuit maani nunatsinni issittumilu atugarisaat pillugit suliat qanoq-una ilusilersorneqarniartut?

- Issittumi siunnersuisoqatigiit aaqqissuussaanerat maanna siunissamilu qanoq politikkikkut aaqqissuunneqassava?

Danskit naalakkersuisui issittumi silaannaallu kissatsikkiartornerani imminut nittarsaattupilussuusarluni ataatsimeersuarnermi peqataannginnerat tulluartuunngilaq, Juliane Henningsen naggasiivoq.

Nunatta Folketingimi ilaasortaatitaata aappaata Lars-Emil Johansenip Juliane Henningsen isumaqatiginngilaa. Sammisamut tunngatillugu oqartussat issittoq pillugu ataatsimeersuarnermi peqataarpiannginnerat soqutiginninnginnermik peqquteqanngilaq, Danmarkimili politikkikkut eqqissiviilliorneq tunniusimannginnerujussuarmut peqqutaavoq, Lars-Emil Johansen oqarpoq.