Danmarkimi nunasisut kalaalliniit atugarissaarnerupput

januaarip 28-at 2007 13:15

Danmarkimi nunasisut allamiut inuiaqatigiinnut akuunerulernissaat anguniarlugu ikiorsiissutinik neqerooruteqarpoq, kalaallinulli Danmarkimi najugalinnut neqerooruteqarani. Tamanna taakkununnga toqqortulernermik nakkaannermillu kinguneqartitsisartoq, Danmarkimi aviisip stiftidende-p qulequttatut angisuutut ullumi saqqummiuppaa.

Kalaallit Danmarkimut nuussimasut arlalitsigut nunasisutulli allatut inuiaqatigiinnut akuunerulernissamik neqeroorutinik pisariaqartitsisaraluarput, kalaallinulli immikkut neqerooruteqartitsisoqannginnera ajornartorsiutaavoq, Århusip universitetiani inuiaqatigiilerineq pillugu ilisimatooq Lise Togeby aviisimut taama oqarpoq.

- Nunasisut allamiut danskisut oqalussinnaanngitsut ajornartorsiuteqartullu kalaallinut taamatoqqissaaq atugalinnut sanilliullugit atugarissaartitaanerupput. Danskisullu innuttaassuseqarmata akuunerulernissamik neqeroorfigineqarsinnaanngillat, Lise Togeby oqarpoq.

Kalaaleq Danmarkimut nuuttoq danskisulli allatut isigineqartarpoq. Kalaalerli danskisut oqalussinnaanngikkaangami danskillu inuiaqatigiittut inooriaasiannut ilisimasaqanngikkaangami inuttut nakkaattarpoq allaat naqqanniffissaa tikillugu nakkartarluni.

Taamatuttaaq Århusimi kalaallit illuanni pisortaq Svend Kolte ima oqarpoq:

- Kalaalerpassuit kulturikkut oqaatsitigullu danskinut inuiaqatigiinnut allarluinnaapput, taamaattumillu ikiortariaqarlutik. Danmarkimut nuukkaangamik danskisut tuluttulluunniit oqalussinnaasanngillat taamaattumillu inuiaqatigiinnut akuutikkuminaatsorujussuusarlutik, Svend Kolte oqarpoq.