Danmarkimi nunap immikkoortuini coronamut akiuussusiinersuaqartoq
Danmarkimi inuit ullormut 100.000-t coronavirusimut akiuussuserneqarsinnaappat?
Danmarkimi suleriaatsit aallaavigalugit inuit taama amerlatigisut ullormut akiuussuserneqarsinnaasut, Danmarkimi naalakkersuisut siorna ukiakkut oqarput.
Akiuussusiinermi suleriaaseq ullumi ataasinngornermi misileraaffiussaaq, Covid-19-imummi akiuussutissat amerlanerit Danmarkimut tikiunneqartalerpata Danmarkimi naalakkersuisut anguniagaat piviusunngorsinnaanersut misileraanerup ullumi takutissavaa.
Nakorsaasiorfiit Pfizer/BioNTechip Modernallu coronavirusimut akiuussutissaliaat ullumi ataasinngornermi akiuussusiinermi atorneqassapput. Nakorsaasiorfiup AstraZenecap akiuussutissaliaa atorneqarunnaarallarnikuuvoq, akiuussutissammi taassuma taqqamikkut milittoornernut qaqutigoortunut attuumaasuteqarsinnaanera misissorneqaleruttorpoq.
Danmarkimi inuit katillutik 101.000-nit ikinnerunngitsut ullumi ataasinngornermi akiuussuserneqassapput.
AAMMA ATUARUK Kinguaattoorneq: Inuiattut ullorsiornissatsinnut akiuussuserneqarnissarput angumerisinnaanngilarput
Taakkunannga 19.640-t nunap immikkoortuata Region Sjællandip akiuussusiisarfiini 21-ni ullumi akiuussuserneqassapput. Tamaani akiuussusiisarfiit maannamut arfiniliinnaagaluarput, akiuussusiinissamulli immikkut suliniut pissutaalluni amerlineqarlutik.
19.640-llu ullumi akiuussuserneqassammata akiuussuserneqartussat pisarnermit arfinileriaammik sinnerlugilluunniit ullumi amerlanerussapput.
Region Sjællandimi peqqinnisaqarfiup pisortaa Trine Holgersen ima oqarpoq:
- Ooqattaarinertut kingullertut upalungaarsimaniarnermulluunniit sungiusarnertut isigaarput. Akiuussusiisarfiit tamarmik pilersaarutit naapertorlugit ornigarneqarluassanersut takuniarparput, akiuussuserneqarnissamillu piffissat inniminnerneqarsimasut tamaasa ullumi atorneqassasut ilanngullugu oqaatigaa.
Coronavirusimut akiuussutissat apriilimi sapaatit akunnerini siullerni 250.000-t Danmarkimut tikiunneqassapput. Taakku maajimi 400.000-nut, juunimi 800.000-nut juulimilu 1,3 millioninut amerlineqassangatinneqarput.