Danmarkimi nakorsaaneq: HIV pillugu qaammarsaasoqaqqilli
Danmarkimi agguaqatigiisillugu inuk sapaatip-akunneranut ataaseq HIV-imik tunillanneqarsimasoq ilisimatinneqartarpoq.
- Inuusuttut 17-iniit 20-nut ukiullit tunillanneqartalersimasut suliffitsinni maluginiarpagut, ilisimatooq Hvidovremilu nakorsaaneq Jens Ole Nielsen oqaluttuarpoq nangipporlu; inuusuttut 20-t missaanni ukiullit tunillanneqarsimallutik nakorsiaraangata tupaallannartorujussuusarpoq. Danmarkimi HIV pillugu oqallittoqarpiannginnerata kingunerisaanik taakku amerlanersaat isumaqartarput HIV-imik tunillanneqarsinnaanatik.
Inuusuttut tunillanneqarsinnaanerminnik soqutiginngittarnerat marlunnik nakorsaanerup nassuiaatissaqarsoraa:
- Danskit peqqinnissakkut qullersaqarfiat 1985-imiit 90-p tungaanut HIV pillugu qaammarsaasorujussuuvoq. Taamanikkullu meeraaraasut ullumikkut inuusuttunngortut iluamik paasisaqarpiarnikuunngillat. Taassumalu saniatigut nappaat taanna pitsaanerusumik katsorsaasarnigut pissutaallutik piffissap ingerlanerani allanngoriartornikuulluni. Tamatumalu kingunerivaa tunillanneqarnissamik soqutiginnikkunnaariartorneq, Jens Ole Nielsen oqarpoq qaammarsaaqqittoqarnissaalu taassuma ujartorpaa;
- Taamanikkut qaammarsaanerit uteqqittariaqarpagut. Siunnersuutigerusupparalu meeqqat atuarfianni aamma qaammarsaasoqaqqissasoq Jens Ole Nielsen oqarpoq.
Danskilli peqqinnissakkut qullersaqarfiannit tamanna ilalernartinneqanngilaq. Clamydiali pillugu innuttaasunik qaammarsaanissaq soqutigineqarneruvoq.
Danskit peqqinnissakkut qullersaqarfiat ukiumi matumani kingusinnerusukkut kinguaassiuutit nappaataannik innuttaasut qanoq ilisimasaqartiginersut paasiniarlugu misissuititsissaaq.
