Danmarkimi nakorsaaneq: Coronamut iisartakkap virusi timimi siaruatsaaliorsinnaavaa

Aarhus Universitetetimilu professorip Aarhus Universitetshospitalimilu nakorsaanerup Lars Østergaardip iisartagaq neriulluarnartutut taavaa.

- Paasissutissat ikittuinnaat maannamut saqqummereerput. Saqqummereersulli eqqortuuppata, nakorsaatissaq neriulluarnarsinnaavoq, Lars Østergaard oqarpoq.

Europammi nakorsaatinut aqutsisoqarfiup (EMA-p) nakorsaat iisartagaq molnupiravir sapaatit akunnerisa tulliani nalilersorniarlugu sisamanngornermi paasissutissiissutigaa.

Molnupiravir timip viruseqarneruleriartornissaanik pinngitsoortitsisinnaasoq, Lars Østergaard nassuiaavoq.

- Tassalu tunillaanissamut aarlerinannginnerulissaaq, taamatullu tunillaassuukkunnaamisitsisinnaassalluni.

- Aamma virusi timimi minneruppat, nappaatip ineriartornera ilungersunannginnerussaaq, Lars Østergaard oqarpoq.

Amerikamiut nakorsaasiorfiat Merck nutaamik iisartagaliortuuvoq.

Danmarkimi nakorsaanerup iisartagaq Danmarkimi atorneqarsinnaalerumaarsinnaasoraa.

- Paasissutissarsiarisimasagut eqquutissagunik iisartagaq coronamik katsorsaanitsinni atorneqarsinnaalissasoraara.