Danmarkimi ministerit nutaat sisamat
Nunanut allanut ministerip Villy Søvndalip tunuarneratigut Kalaallit Nunaat Issittumi nunanut allanut politikkikkut oqallisaaqisumut nutaamik qullersaqalissaaq.
Ruslandip præsidentia Putin Issittumi sakkutooqarnikkut annertusaaniarluni ippassaq nalunaaruteqarpoq. Danmarkillu Issittup imartaani piumasaqaatigisaminik aappaagu tunniussaqartussaalluni. Suliassallu taakku tamarmik nunanut allanut ministerinngortup Holger K. Nielsenip suliassarilissavai, aamma Arfanniarneq pillugu nunat tamat ataatsimiititaliarsuani Danmarkip ilaasortaanerata assortuussutaanera Kalaallit Nunaatalu aatsitassanik qinngornernik ulorianartunik akulinnik avammut nioqquteqarsinnaaneranut kina oqartussaanersoq suliassaasa ilagissavaat.
Inatsisinik atuutsitsinermut ministerinngortup allaffiani Kalaallit Nunaat pillugu pingaarutilinnik amerlasuunik aalajangiisoqartussaavoq. Inatsisinik atuutsitsinermut ministerinngortup Karen Hækkerupip suliassarilerpai Kalaallit Nunaanni eqqartuussiveqarnermi suliassat qaleriiaatiinnalersimasut, Pinerluuteqarsimasunik Isumaginnittoqarfimmi inissaaleqisoqarnera, Nuummi parnaarussiviliornissaq minnerunngitsumillu aamma suliniutinut anngisuunut apeqqutaalluinnartumik allamiunut inatsimmi aalajangersakkat allanngortinneqarnissaat.
Naalakkersuisunngortuni tupaallannarnerpaaq tassaavoq EU-p parlamentiani ilaasortaq Dan Jørgensen, inuussutissanut, nunalerinermut aalissarnermullu ministerinngortinneqartoq. Dan Jørgensen politikeritut qorsunnut qaninnerusutut aammalu uumasunik atugarissaatitsinissamik pingaartitsisutut ilisarisimaneqarpoq. Assersuutigalugu EU-p puisineersunik nioqqutissanik eqqusseqqusiunnaarnera taperserpaa, peqatigisaanilli Kalaallit Nunaanni puisinniarneq illersorniarlugu naggueqatigiit inuit eqqusseqqusinnginnermut ilaatinneqannginnissaat sulissutigalugu.
Ministerinngortut sisamat nalliuttorsiorpaluttumik katerisimaarnermi ullumi ivertinneqassapput. Karen Hækkerupip, Holger K. Nielsenip Dan Jørgensenillu saniatigut Jonas Dahl akileraartarnermut ministerinngortinneqarpoq.