Danmarkimi ministerinik paarlaassuipput

Ministeriuneq Lars Løkke Rasmussen ministerinik ullaaq-manna paarlaassuivoq, talerperliusunik naalakkersuisoqartalillarmalli aatsaat taama amerlatigisunik paarlaattoqarluni.

nunanut allanut ministeri tassaalerpoq konservativit siulittaasuat Lene Espersen. Danmarkimi nunanut allanut ministeriusimasoq, Per Stig Møller, maanna kulturministerinngorpoq. Lene Espersen aningaasaqarnermut inuussutissarsiutinullu ministeriugaluarpoq.

Ministerit nutaat arfineq-marluupput - konservativineersut marluk Venstremeersullu tallimat. Maluginiagassaavoq konservativineersup Lene Espersenip ministerit marluk Christiansborgip avataaneersut nammineerluni toqqarmagit.

Ministerit arfineq-marluk naalakkersuisunit peerput, allat allanik akisussaaffeqalerlutik. Maluginiarneqarnerpaassaaq illersornissamut ministerip, Søren Gadep, atorfini qimaannanngimmagu, politikkimilli tunuavimmat, nuanniitsunik arlalinnik pisoqareersorlu, soorlu atuakkap Jægerenip nutserneqarneranut tunngassutillit, aamma "kalerriussassaanngitsumik kalerriussisimanera" pillugu.

Akileraartarnermut ministeriusimasoq Kristian Jensen naalakkersuisunit aamma tunuarpoq, Folketingip gruppiani siulittaasunngussalluni.

Ministerit paarlaassornissaat qangali ilimagineqalerpoq. Politikkikkut oqaaseqartartut arlallit oqaluuseraat, Lars Løkke Rasmussen Danmarkimi aatsaat pimoorullugu ministeriuningulersoq.