Danmarkimi ministeri: Issittup soqutigineqarnera Kalaallit Nunaanni ineriartornermut iluaqutaasinnaavoq

Issittumi eqqissineqarnissaa, aningaasarsiornikkullu ineriartortoqarnissaa, Issittumilu innuttaasut nammineq aalajangiinissamut pisinnaatitaaffeqarnissaat, Danmarkip soqutigisaraa.
USA-llu Issittumik soqutiginninnerujartuinnarnera, matumani Kalaallit Nunaat ilaalluni, Danmarkip soqutigisaanut naapertuuppoq.

Isumannaallisaaneq pillugu Münchenimi ataatsimeersuarnermi Issittoq immikkut ittumik sammineqarmat, Danmarkip nunanut allanut tunngasunut ministeria Jeppe Kofod oqalugiarnermini taama ilaatigut oqarpoq.

- Issittumut tunngatillugu pingaaruteqarpoq oqaatigissallugu tamaani innuttaasut nunallu ineriartornermi salliutinneqassasut, Issittumi qanoq-iliuusissat pillugit siuttuusariaqarlutik, nunanut allanut tunngasunut ministeri Issittoq pillugu oqallinnermi oqarpoq.

- Issittumi innuttaasut ataqqineqarlutik Issittumi eqqissineqarlunilu aningaasarsiornikkut ineriartortoqarnissaa, naalagaaffeqatigiinni pingaarnertut anguniarneqarpoq.

Isumannaallisaaneq pillugu Münchenimi ataatsimeersuarneq nunarsuarmi annerpaattut taaneqartarpoq. Issittullu ataatsimeersuarnermi immikkut sammineqarnerata takutippaa Issittoq pingaaruteqaleraluttuinnartoq, Jeppe Kofod oqarpoq.

Issittullu soqutigineqarnera ilutigalugu nunat pissaanilissuit USA Kinalu aamma soqutiginnikkiartuinnarput.

Tamanna assersuutigalugu Kalaallit Nunaannut iluaqutaasinnaasoq, Jeppe Kofodip oqaatigaa, aningaasaliinerit amerliartuinnarsinnaallutik.

Inuussutissarsiornermulli politikkimut aamma sunniuteqarsinnaavoq, assersuutigalugumi Kinamiut attaveqaqatigiinnermut suliffeqarfissuannik Huaweimik suleqateqarneq isumannaallisaanermut politikkimut tunngassuteqalersinnaavoq.

Huaweip nunap ataqatigiinnermut atortulersugaaneranut tunngasunut suleqatigineqannginnissaa, USA-p nunanut tamalaanut angalalluni mianersoqqussutigaa.

Danmark tamakku pillugit akerleriissuteqartoqarnernut peqataajumanngitsoq qularutigineqassanngilaq Danmark nunamut pissaanilissuarmut sorlermut suleqarumanerunersoq:

- USA Kunngeqarfik Danmarkip isumannaallisaanermi politikkimut tunngasuni pingaarnertut iligisariinnanngilaa, NATO-mili iligiinni aamma pingaarnertut iligisaralugu. Taamaammat USA-p Kalaallit Nunaannik soqutiginninnerujartuinnarnera nuannaarutissaavoq, Jeppe Kofod oqarpoq.

- Kalaallit Nunaanni pisortatigoortumik sinniisoqarfimmik ammaaqqinniarput. Tamanna Kalaallit Nunaanni inuiaqatigiinnut tamanna pingaaruteqarpoq, nunanut allanut tunngasunut ministeri oqarpoq.

    /ritzau/