Danmarkimi matoqqatitsinerit sivitsorneqariaannaasut

Danmarkimi innuttaasut sapaatip-akunnerini tulliuttuni marlunni angerlarsimaannaqquneqarnissaannut angalannginnissaannullu kaammattorneqarnerat sivitsorneqariaannaavoq.

Danmarkimi peqqissutsimut ministeri Magnus Heunicke (S), Statens Serum Institutimilu pisortat ilaat Kåre Mølbak tusagassiortunik katersortitsinermi taama oqarput.

- Taama pisoqarsimanngisaannarpoq. Pisullu eqqarsaatigalugit upalungaarsimanissaq pingaaruteqarpoq, kinguarsimassanngilagut, Magnus Heunicke, tusagassiortunik katersortitsinermi ilaatigut oqarpoq, nangillunilu:

- Angerlarsimaannarnissamik angalasoqannginnissamillu kaammattuutip sivitsorneqarnissaata ammaffigineqarnera sillimaffigaarput. Taamaalisoqartariaqassanersorli maannangaaq oqaatigisinnaanngilarput. Tamanna pillugu piaarnerpaamik aalajangiiumaarpugut, peqqissutsimut ministeri oqarpoq.

AAMMA ATUARUK Coronamik tuniluutsitsinaveersaarneq: Danmarkimi atuarfeqarfiit suliffeqarfiillu matusut

Nualluutip tuniluutilertornerani sapaatip-akunnerani siullermi aappaaniluunniittugut, Kåre Mølbakip Statens Serum Institutimeersup oqaatigaa. Assersuutigalugu influenzap tuniluutilertortarnera sapaatip-akunneri aqqaneq-marluk 16-illu akornanni sivisussuseqakkajuppoq.

- Killilersuinerit qanoq sivisutigisumik atuutsinneqassanersut oqaatigisinnaanngikkallarparput.

- Sapaatip-akunneri ataasiakkaarlugit nalilersuisassaagut, killilersuinerit qanoq sunniuteqarnersut takusassallutigit, Kåre Mølbak tusagassiortunik katersortitsinermi oqarpoq.