Danmarkimi kommunit nunatsinni suliassarsiulerput
Danmarkimi kommunit ingerlalluarpallaanngitsut Kalaallit Nunaanni aatsitassarsiulernissanut peqataanissaq periarfissatsialattut isigilerpaat.
Allaammi kommunip ineriartortitsinermut inuussutissarsiornermullu immikkoortortaqarfiata ilimagisinnaasoraa, Korsørip umiarsualiviata, Sjællandip Kalaallit Nunaatalu umiarsualiviattut atulersinnaanera.
Kommunimi napparsimmavik, sakkutooqarfik aamma qatserisartut aannaassiniartartullu ilinniarfiat upalungaarsimasuutitaqarnermik isumaginnissinnaapput soorluttaaq ilinniarfiit Kalaallit Nunaanni suliarineqalersussanut tunngatillugu ilinniarfiusinnaasutut takorloorneqalereersut.
Kommunip aamma naatsorsuutigaa Kalaallit Nunaanni ineriartornermut atatillugu nunaqarfiit matullugit illoqarfiliortoqartalerumaartoq, taamaattumillu illut, niuertarfiit, mittarfiit, aqqusernit umiarsualiviillu sanaartorneqarnissaat ilimanarsereersoq.
Ugeavisen Slagelsemi allaaserisaq naapertorlugu, suliffeqarfik Kecon Skælskørimiittoq ineriartortitseqataanissamut aqqutissiueqataavoq, taakkumi Kommuneqarfik Sermersuup Qinngorput-mi sanaartortitaani aneerasaartarfiit aamma Brugsen Nuummi "nakkarnaveeqqutit" sanasimavaat.
