Danmarkimi kommuninik kattussuutsitsinersuaq iluatsippallaanngilaq

Danmarkimi kommuninik kattussuutsitsinersuaq, ukiup aappaata affaata matuma siornagut iluatsilluartussatut isigineqartoq iluatsippallaanngilaq. Utoqqaat, ilaqutariit meerartallit, innarluutillit isumaginninnermilu sullinneqartartut pisortanit pitsaanerusumik sullinneqalernissaat anguniagaagaluarpoq. Taamali pisoqaqqajarsimanngitsoq, aviisimi Berlingske Tidendemi ullumi allaaserinnittoqarpoq.
Allattoq Louise M. Kleemann
maajip 09-at 2008 09:27

Tassa sullissineq ajorseriarsimavoq, suliaminnut pikkorlunnerulersimapput, aningaasaliissutillu ikileriarsimallutik, tassa kommunini pisortat amerlanersaat taama isummerput.

Pisortat Kattuffiata aamma Aarhusimi Handelshøjskolip kommunini nutaani misissuinerisa nutaap tamanna ersersippaa.

Kommunini pisortat affaat naliliipput, kommunini innuttaasut kiffartuunneqarnerat ullumikkut ajorseriarsimasoq, taamaallaat pisortat 15 procentii isumaqarput sullissineq pitsaanerulersimasoq.

Danmarkimi kommuninik kattussuutsitsiniarnermi tunngavilersuutigineqartut ilagaat kommunit sullissilluarnerulernissaat. Tamannali aamma iluatsippallaarsimanngilaq. Tassami pisortat quliugaangata sisamat sullissineq ajorseriarsimanerarpaat, pisortallu quliugaangata taamaallaat pingasut sullissineq pitsanngoriarsimanerarpaat.

Atugarissaarnermut ministerip Karen Jespersenip kommuninik aaqqissuusseqqinneq tunngavimmigut ajoquteqannginnerarpaa. Taassuma 2003-mi Bornholmimi kommunit kattussuunneqarmata, aatsaat ukiut marluk-pingasut qaangiummata iluamik ingerlasoqalernera innersuussutigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq