Danmarkimi kommunimut qinersisoqareersoq Socialdemokratit partiit anginersariuarsinnarpaat
Partii Venstre taaguunneqarnerpaat aapparaat, 1,9 procentimik siuariarluni, taamaasillunilu 26,6 procentinik taaguunneqarluni.
Socialdemokraatit kinguarialaartut, partii naalakkersuisooqataasoq SF kinguariarneruvoq. Patii 5,6 procentiinnarnit taaguunneqarpoq, partiillu Villy Søvndahlimit siuttuuffigineqarnerata nalaani 2009-mi kommunimut qinerisoqarneranut naleqqiullugu kinguariarneruvoq malunnaatilik, taamani 14,5 procentinit taaguunneqarami.
Konservativet aamma kinguariarput, 2009-mi 11 procentinit taaguunneqarput maannalu 8,6 procentinit taaguunneqarlutik.
Enhedslisten kommunimut qinersinermi siuariarpoq. Partii 2009-mi 2,3 procentinit taaguunneqarpoq qinersinermilu matuma 6,9 procentinit taaguunneqarluni.
Dansk Folkepati kommuninut tunngatillugu Danmarkimi partiit anginerit pingajorilerpaat, partii 2009-mi 8,1 procentinit taaguunneqarpoq maannalu 10,1 procentinit taagunneqarluni.
Radikalet Liberal Alliancelu aamma siuariarput. Radikalet 4,8 procentinit taaguunneqarput Liberal Alliancelu 2,9 procentinit taaguunneqarluni. Radikalet 2009-mi 3,7 procentinit taaguunneqarput Liberal Alliancelu 0,3 procentinit.
Qinersisinnaatitaasut 71,9 procentii qinersiartorsimapput, kingullermik kommunimut qinersisoqarmat 65,8 procentiusimallutik.
Ilimagineqareersutullu Socialdemokraatit, kiguarialaaraluarlutik, Danmarkimi illoqarfinni anginerni sisamani Københavnimi, Aarhusimi, Odensemi Aalborgimilu borgmestereqartitsiinnarput.