Danmarkimi kommunimut qinersinermi SF aamma DF ajugaassangatinneqarput
Maannali paasinarsereerpoq SF aamma Dansk Folkeparti siuariarujussuassasut, Socialdemokratilli Sorsunnersuit Aappaata kingornagut kommunimut qinersisarnerni aatsaat taama ajortigisumik angusaqassangatinneqarput.
SF-ip saniatigut Dansk Folkeparti qinersinermi ajugaarujussuarpoq. Dansk Folkeparti maanna folketingimi qinersinermi angusamittut angusaqassangatinneqarput. Tamatunnga nassuiaatigineqarpoq, kommunimut qinersisarnernut siuliinut naleqqiullugu nunasisunut politikkip pingaartinneqarnerulernera.
DR-ip qinersiartortunik isumasiusitsinera najoqqutarissagaanni Konservativet siuarialaassapput. Venstrellu kinguariassangatinneqarlutik.
Socialdemokratit kinguariaraluarlutik Danmarkimi illoqarfiit annerit sisamaasut borgmestereqartitsiffigilissavaat. Frank Jensenip Ritt Bjerregaard taarserlugu Københavnimi borgmesteriuninngussaaq. Odensemi Anker Boyep Socialdemokratiusup borgmesteriunini qinersinermi kingullermi annaasaraluani uterteqqissavaa. Aamma Socialdemokratiusoq Nicolai Wammen Århusimi borgmesteriuinnassaaq soorluttaaq Aalborgimi Socialdemokratit borgmesteriutitaat ingerlaqqissaaq.
Qinersinerup inerneri aqagu misissuataarneqarsinnaassapput.
Naggasiullugu oqaatigisinnaavarput, KNR-TV-p Danmarkimi kommunimut qinersineq pillugu aallakaatitsinissani taamaatimmagu. Tamatumunnga taarsiullugu Amerikamiut filmiliaat erinarsugassiartalik - Romance and Cigarettes - aallakaatinneqassaaq.
