Danmarkimi klamydiartorpassuit
Kinguaassiuutitigut nappaat klamydia Danmarkimi aatsaat taama atugaatigaaq. Danskit katillugit 50.000-it klamydiamik tunillatsissimapput, aatsaallu taama amerlatigalutik. Tunillatsissimasut inuusuttuupput 15-it 29-llu akornanni ukiullit.
Klamydiamilli tunillatsissimasut aatsaat taama amerlatigisut nalunaarsorsimanerat danskit peqqinnissaqarfiannit aappaatigut nuannaarutigineqarpoq.
- Taama amerlatigisut nalunaarsorsimanerata takutippaa kinguaassiuutitigut nappaatit pillugit siorna paasisitsiniaasimanerput iluamik sunniuteqarsimasoq. Amerlanerujartortut misissortittalerput nakorsarneqartalerlutillu. Illoqarfinni minnerni imaannerusarpoq, assigiinngitsunik qinigassaqarpiannginneq pissutigalugu, inuusuttut atoqatigiittartut immaqa inunnik taakkuunerusunik innaqateqartartut, taamaammat tunillaassuivallaannginnissaq anguniarlugu misissortikulanissaq pisariaqarpoq, Peqqinnissakkut Qullersaqarfimmiit nakorsaq, Jan Fouchard, aviisimut MetroExpressimut oqarpoq.
Klamydiamik Kalaallit Nunaanni tunillatsissimasut aamma amerlaqaat. Klamydiamik nunatsinni siorna tunillatsissimasut Danmarkimut naleqqiullugit aqqanileriaammik (inuttussuseq aallaavigalugu amerlassusaasa agguaqatigiissinnerat, aaqq.) qaffasinnerusimapput.
Nakorsianngikkaanni klamydiap kingunipiluinut ilaasinnaapput: Meerartaarsinnaajunnaarneq, katsorsarneqarsinnaanngitsumik akussakkut aseruuttorneq illissallu paavatigut naartulerneq.
