Danmarkimi katuullini qulaajaasoqassagunanngilaq

Katuullit palasit meeqqanik kinguaassiuutitigut atornerluisarnerat pineqarpoq. Danmarkimili ilagiit katuullit isumaqarput atornerlunneqartut atornerlunneqartulluunniit angajoqqaatut oqartussaasut atornerluinerit politiinut nalunaarutigissallugit namminneq aalajangertassagaat.

Aamma ilagiinni danskit naalagaaffiata tapersersugaani atornerluisarnerit nalunaarutigineqartarnissaat naatsorsuutigineqassanngilaq. Tassami atornerluinernik ilisimalikkat allat susassarinngisaannik palasimik oqaloqateqarnermi paasineqarpata. Tassami palasip nipangiussisussaatitaanera unioqquteqqusaanngilaq. Tamanna ilagiit danskit naalagaaffiata tapersersugaani palasit palasinngorniarnerminni ilinniartarpaat.

Taamaaliornikkut ilagiinni katuullini ilagiinniluunniit danskit naalagaaffiata tapersersugaani assigiinngissuteqartoqanngilaq. Atornerluisoqarsimagaangat palasit oqartussaasunut oqaluttuartussaatitaanngillat, tamanna allat susassarinngisaattut oqaloqatigiissutineqarsimatillugu, taama Københavnimi palasinngornianut seminariami lektori Elmo Due nassuiaavoq.

- Tunngaviatigut uagut palasitut inatsisilerituutut illersuisutulli nipangiussisussaatitaavugut, Elmo Due oqarpoq.

Nipangiussisussaatitaaneq aamma atuuttarpoq, ilagiinnut ilaasoq kinaluunniit allat susassarinngisaannik oqaluttuarsimappat meeqqanik atornerluinermut kajumissuseqaqqajaasarluni imaluunniit ilagiinnut ilaasoq palasimit allamit kinguaassiuutimigut atornerlunneqarsimappat palasillu taamaaliortup unnerluutiginissaa kissaatiginagu, Fynimi biskoppip Kresten Drejergaardip oqarneratut.

- Taava palasip tamanna perruumaataarutigissanngilaa, taanna nipangersimasussaatitaavoq.

Taavami ilissi palasitut palasi alla ajornerpaat ilaannik pinerluuteqarsimappat, tassalu meeqqanik atornerluisimasoq, nakkutigissanngilisiuk?

- Naagga, nakkutigisussaavarput, taama oqartarpugut.

Nipangiussisussaatitaanermik oqallinneq issaq Kristeligt Dagbladimi aallartinneqarpoq, Danmarkimi ilagiinni katuullini qullersaq Czeslaw Kozon oqaaseqarmat, atornerlunneqartut imaluunniit atornerlunneqartunut angajoqqaatut oqartussaasut tassaasut atornerluisimanermik nalunaaruteqartussat, tamatumani ilagiit pisussaatitaanngillat. Tamanna aamma ilagiinniluunniit danskit naalagaaffiata tapersersugaanut atuuppoq, aammali killissaqarluni, killissalli ullumikkut qanoq nassuiarneqassanersut suli nalorninarnerujussuulluni, palasinngornianut seminariamit Elmo Due ilanngullugu oqarpoq.

- Amerlanerit oqassagunarput tamanna nuanniitsuusoq, oqaluttuussaq ajoqusernagu ajutoornerit pinngitsoortissagaanni, taava taamaaliortoqartariaqarpoq, Elmo Due oqarpoq.

Kisiannimi soorlu meeqqanik kinguaassiuutitigut atornerluisartoq oqarpat, tamakkununnga kajumissuseqaqqajaasarpunga, tamatumani killiliussat pineqassannginnamik palasilu politiinut oqaluttuarluni, una meeqqanik kinguaassiuutitigut atornerluisartoq?

- Naagga, taamaalioraanni taava oqaluttuarfigisaq illersorneqarnavianngilaq, DR ilanngutassiivoq.