Danmarkimi kalaallit palaseqartitaanerat aappaagu aalajangiiffigineqassaaq
Danmarkimi palasit peqatigiiffianut allakkat assinganik Jens Kristian Kleist nassinneqarpoq, Namminersorlutik Oqartussani ilinniartitaanermut oqaluffeqarnermullu naalakkersuisoqarfimmi pisortaq Mikael Kristensen radioaviisimut oqarpoq. Aviisip Sermitsiap nittartargaani ullumi allaaserineqarpoq, Jens Kristian Kleist allakkatigut nalunaarfigineqarpoq, atorfia ukioq 2011-imi atorunnaarsinneqassasoq. Danmarkimi palasitut atorfiup atorunnaarsinneqannginnissaa pillugu Naalakkersuisut siulittaasuat Kuupik Kleist allakkaatigut qulakkeereeraluaraa, atorfiup atorunnaarsinneqarniarnera Jens Kristian Kleistimit eqqumiigineqarpoq. Namminersorlutik Oqartussani atorfilik Mikael Kristensen radioaviismut oqarpoq, Jens Kristian Kleistip allagarsiarisimasaa nutaartaqanngitsoq. Danmarkimi palasit peqatigiiffiat Den Danske Præsteforening Namminersorlutik Oqartussanut saaffiginnittpoq, kalaallit Danmarkimi palasimik atorfeqartitsinerat qanoq siunissami pineqarniarnersoq paasiniarlugu. Saaffiginnissutip akissuteqaataata assinganik Jens Kristian Kleist nassinneqarpoq. Danmarkimi palasit saaffiginnissutaannut akissuteqarnitsinni nalunaarutigaarput, kalaallit Danmarkimi palaseqartitaanerannut siunissami aaqqiissutissamik suli aalajangiisoqanngimmata, Mikael Kristensen oqarpoq. Tamannalu imatut paasineqassanngitsoq Jens Kristian Kleistip atorfia atorunnaarsinneqassasoq. Namminersorlutik Oqartussat Danmarkimi palsit peqatigiiffiannut allagaqarput, siunissami Danmarkimi kalaallit palaseqartitaanerannut tunngassuteqartoq aappaagu 2010-imi aaqqiivigineqarumaartoq, allakkallu taakkua assinganik Jens Kristian Kleist nassinneqarpoq.
Inuit Ataqatigiit politikkikkut oqaaseqartartuata Inatsisartunilu Kultureqarnermullu ataatsimiititaliami ilaasortap Juliane Henningsenip Danmarkimi palasip atorfiata atorunnaarsinneqarnissaa pillugu qisuariarpoq.
Danmarkimi palasitut atorfiup atorunaarsinneqarnissaa isumaqatiginngilarput, Danmarkimi palasitut atorfiup aaqqiivigineqarnissaa pillugu suliniuteqartoqarmat, Juliane Henningsen allappoq. Ilanngullugu paaserusuppaa Danmarkimi palasitut atorfiup atorunnaarsinneqarnissaanik kina allagaqartuunersoq.
