Danmarkimi kalaallit illuutaat: TV-ikkut takoqqusaarusiortoqartalerli

Danmarkimi kalaallit illuutaat ukiuni arlalinni nittartagartik aqqutigalugu Danmarkimut nuunniartunut paasissutissiisarput. Danmarkimut nuutsigani initaarnissamut allatsissimanissaq pingaaruteqartoq erseqqissaatigineqartunut ilaavoq, inissiaatileqatigiiffiillu arlallit nittartakkami attaveqarfigeriaannanngorlugit atassuserneqarsimapput. Taamaakkaluartorli nuunniartut tamarmik initaarniarlutik allatsinneq ajorput.

Danmarkimut nuunniartut tamarmik nuutsigatik internetimi nittartakkanik misissuineq ajorput. Soorlu nunatsinniit 16-t Århusimut qanittumi nuuttut misissuisimanngillat, kalaallit illuutaanni inunnik siunnersorti Simon Lynge nalunaarpoq. Tasamani kalaallit illuutaata nittartagaa pillugu ima oqarpoq:

- Nittartagarput ersarippallaarsimanngitsoq paasisarpara, ajoraluartumillu pappialanngorlugu saqqummersissinnaasimanngilarput, Simon Lynge oqarpoq.

Københavnimi kalaallit illuutaanni inunnik siunnersuisartoq Inuk Sonne nuuginnavillutik nuuttartunik ilisimaarinnilluarpoq. Taassuma siornatigut siunnersuutigisimavaa KNR TV-kkut takoqqusaarusiortoqassasoq, taama nuuttartut ikilisarneqarniassammata. KNR TV-mi isiginnaartartut Danmarkimut nuunniarlutik eqqarsalersimagunik sutigut piareersarnissaannik paasissutissiiffigineqarsinnaapput. Soorlu inuit allattorsimaffiannut allatsinnissaq pingaaruteqarpoq, pisortanit ikiorsiivigineqarniaraanni aalajangersimasumik najugaqarfeqarnissaq aamma pingaaruteqartinneqarluni.

KNR TV-ikkut takoqqusaarusiornissaq Ålborgimi kalaallit illuutaanni inunnik siunnersortip Vibeke Sieborgip tapersersorpaa:

- Isumassarsiatsialaavoq. Internetimi nittartakkanik ujaasisinnaanngitsut taamaalillutik aamma paasissutissiiffigineqarsinnaalissagaluarput, Vibeke Sieborg naggasiivoq.

Radioavisimit Danmarkimi kalaallit illuinut paasiniaanitsinni paasivarput, nunatsinniit Danmarkimut nuuginnavillutik nuuttartut Århusimi kalaallit illuutaanni sulisunit maluginiarneqarnerpaasimasut.