Danmarkimi kalaallinut nutaarsiassatsialak

Danmarkimi aningaasanut inatsimmi aningaasat siunertanut pitsaasunut atugassat ikilisinneqarnissaat ilimanarunnaarmat kalaallinut ikiorsiissutit ataannartussanngorput.
aggustip 25-at 2010 06:28

Aningaasanut inatsimmi aningaasat siunertanut pitsaasunut atugassat ikilisinneqarnissaat danskit naalakkersuisuisa ajornartorsiutigilissavaat.

Tamannalu kalaallinut Danmarkimiittunut nutaarsiassaavoq nuannersoq, tassami tamatumani ornittakkat kalaallillu illuutaat amerlaqisut aningaasanit pitsaasumut atugassanit taakkunanngarpiaq taperserneqartarmata.

Naalakkersuisut amerlanerussuteqarniarunik Folketingimi ilaasortanik attaviitsunik, isumaqatiginninniartussaapput. Attaviitsut aningaasanik siunertanut pitsaasunut atugassanik pingaartitsisuupput.

Danmarkimi naalakkersuisut assersuutigalugu soorlu siornatigut Konservativit siulittaasorisimasaata Pia Christmas Møllerip taasinera qulakkeerniassagunikku, taava taassuma aningaasat siunertanut pitsaasunut atugassat 1 milliardiniit 300 million koruuninut ikilisinneqarnissaat isumaqatiginavianngilaa, nutaarsiassaqartitsivik Ritzau taamatut allaaserisaqarpoq.

Aammattaaq Konservativit Kalaallit Nunaannut tunngasunut siornatigut oqaaseqartartuata Per Ørum Jørgensenip innuttaasunut sanngiinnerusunut, aningaasanit taakkunannga ikinnerusunik pissarsisussanngortussanut, pitsaasumik taarsiissuteqarnissaq ajunngitsumik qulakkiissavaa, per Ørum Jørgensen aningaasanut inatsit tapersersorlugu taasissappat.

Danmarkimi naalakkersuisut partiit Fokus imaluunniit Liberale Alliance immikkut assigiinngitsunik piumasaqaateqartut ikiortigalugit aningaasanut inatsit isumaqatigiissutiginiarsinnaavaat.