Danmarkimi kabeli kipisoornerat Nunatsinni interneteqarunnaaraluarpoq

Nunarput unnuaq nalunaaqutaq 03.41-miit nalunaaquttap akunnerata ataatsip missaani internetikkut attaveqanngilaq. Nunatsinni innuttaasut suliffeqarfiillu tamarmik internetimik atuisinnaajunnaaqqanerannik tamanna kinguneqarpoq.
Allattoq Mads Lynge
maajip 08-at 2013 15:17

Aammali Akiliummik assigisaannillu pisiniarfinni atuisartut eqqugaapput.

Attaveerunnerlu Danmarkimi attaveqatigiinnermut suliffeqarfissuarmi TDC-mi ajutoornermik peqquteqartoq, TDC-mi attaveqatigiinermik suliaqartoq Rasmus Avnskjold, nassuiaavoq:

- Kabeliutitta pingarnerit ilaat Herningip Viborgillu akornanniittoq ajoquteqartoq ullaaq paasivarput. Kabelimi ajoqut taanna ajornartorsiortitsivoq, Atlantikup avannaanut attavimmut sunniuteqartumik, tassalu TDC-p attaviini ajornartorsiuteqarpugut, Savalimmiunik, Islandimik Kalaallit Nunaannillu kalluaasumik, Rasmus Avnskjold oqarpoq.

Tassa Nunarput nalunaaquttap akunnera qaangiuttoq attaveqaqqilerpoq, Telep attaveqaatit allakkoortimmagit.

Telemi sulisoqarnermi pisortaq Karl Henrik Simonsen maanna pulaartoraarput.

Internettikkut attaveqaleqqikkatta qujanaqaaq, tassa Telep attaveqaatit allakkoortimmagit. Karl Henrik Simonsen, qanoruna tamanna paasisariaqartoq?

- Ima paasisariaqarpoq suleqativut Islandimi aqqutigalugit qallunaat nunaannut attaviat Tuluit Nunaatigoortillugu massakkut ingerlapparput, taannalu aamma kinguneqarpoq attaveqaatit tamakkiisumik sukkassuseqarlutik ingerlanngimmata. Tassa sakkortussusaata affaannaanik massakkut ingerlavoq. Ajornartorsiut TDC-p Qallunaat Nunaanni aaqqippassuk tamakkiisumik ingerlaqqilissaagut, Karl Henrik Simonsen oqarpoq.

Kisianni Danmarkimi internetikkut attaviup ajoquteqalernerata Nunatsinni internetsikkut attaveqarneq qanoq ililluni kipisinnaagamiuk. Ajornartoorfimmi attaveqannginnatta Canadakkoortumik?

- Tassa imaakkami Canadamut attavipput sapaatip-akunnera siulleq ajoquteqalerpoq, arlaatigut kittorarsimanngikkuni imaluunniit kortsluteqqavoq. Taamaammat taanna ulluinnarni aqqutigisussaagaluarparput Qallunaat Nunaannut ajoquteqalerutta, kisianni tassa Canadamut attavipput nalaatsorluinnarnikkut atorunnaarnikuuvoq, taavalu Islandiminngaanniit Qallunaat Nunaannut aamma attaveerunnerput patsisaavoq, kisianni tassa Tuluit Nunaatigoortillugu massakkut ingerlapparput, Karl Henrik Simonsen oqarpoq.

Siunissami ajornartorsiummik taamaattumik naammattuuissagaluarutta tamanna piareersimaffigineqarpa?

- Piareersimaffigineqarpoq massakkut. islandip Qallunaallu Nunaata akornanni ajornartorsiuteqarutta Tuluit Nunaannut ingerlaqqissinnaaneq taanna ulluinnarni pisussaagaluartoq taanna ullaaq suugaluarnersoq patsisigalugu atuussimanngilaq, kisianni atuuteqqilerpoq, Karl Henrik Simonsen oqarpoq.

Oqarasuaatit nalinginnaasut, aningaaserivinnilu aningaasanik tigusisarneq kalluarnagu, suliffeqarfiillu assigiinngitsut sulinerannut eqquinani, taakku immikkut attaveqarmata.