Danmarkimi issittorsuuvoq

Ilimasaarutit ullunut tulliuttunut atuuttut tamaasa malillugit unnuakkut ullukkullu Danmarkimi issingaatsiartartussaavoq. Umiarsuit sikusiutit ukiuni 14-ini sikusiorsimanngitsut taamaammat tamassa piareersimatinneqarput.
januaarip 04-at 2010 12:01

Frederikshavnimi sakkutuut imarsiortut sakkutooqarfianni sikusiutit uninngatinneqartut inuttaasa suliassaqartinneqalernertik nuannaarutigaat.

Sikusiutit Danbjørn, Thorbjørn aamma Isbjørn Danmarkimi kingullermik taama issillarmat, 1995-imi 1996-imilu, ulapaartitaapput. Taamanili ukiut tamaasa sikuunissaanik ilimasaarisoqartarsimanngilaq, maannali umiarsuit ingerlaarnerannut ikiuuttussanngortitaalerput, taama oqaluttuarpoq orlogskaptajn, Kim Møller Petersen, sikusiornermi ulluinnarni aqutsisuusoq.

- Ullut qulit 14-illu tulliuttut taamaaginnassappat taava sikumik aserorterisariaqalissaagut, Kim Møller Petersen oqarpoq.

Imartani ikkannerusuni, soorlu Limfjorden-imi, 10 cm-it missaani sikuuvoq. Pisiariaqartinneqassappat kalittaatit sikumik aserorteritinneqassapput, sikusiutimmi itsinertuallaaramik tamaani angalasinnaanngimmata. Annertunerusorli sikuniaannalissappat sikusiutit atorfissaqartinneqalerataannaapput.

- Taamaassappat Lillebælt, Storebælt Øresundilu sikunialissapput, tamaanilu sikusiortariaqalissaagut, Kim Møller Petersen oqarpoq.

Sikusiut Danbjørn 31-nik inuttaqartoq sikumik aallaqqaammut aserorterisinneqassaaq, taannalu 48 timit ingerlaneranni sikumik aserorteriartorsinnaavoq.

Sikusiornermilu aqutsisoq pissangalaanngitsuunnginnerarpoq.

- Kiisami atuuffissatsinnut atulernissarput pissanganalaanngitsuunngilaq, Kim Møller Petersen oqarpoq nangillunilu, naalaarpugut qanorlu iliornissatsinnut piareersimalluta.

Sikuiutit inuttaat aamma piareeqqapput - taakku aamma pissangalaanngitsoorunanngillat, Kim Møller Petersen naggasiivoq.