Danmarkimi inuussutissat nakkutigineqanngimmata naalakkersuisut eqqorneqarpu

Danmarkimi inuussutissat nakkutigineqartarsimannginnerat qulaajarneqalermat naalakkersuisooqatigiit eqqorneqarput.

Dansk Folkepartiip inuussutissat nakkutiginerulerneqarnissaanik siunnersuutaat naalakkersuisooqatigiinnit ullumi oqaaseqarfigineqarput. Ministeriunerup Anders Fogh Rasmussenip ministerimi arlaata immikkut nakkutigineqalernissaa kissaatiginagu oqaaseqarpoq. Aningaasaqarnermut inuussutissarsiornermullu ministeri kingusinnerulaartukkut ima oqaaseqarpoq:

- Ministeriuneq ullaaq manna oqaloqatigivara, Konservativit ministeriutitaasa arlaat immikkut nakkutigineqassanngitsoq kissaateqarfigaara, tamannalu ministeriunerup akuersaapaa. Dansk Folkepartiip taama sakkortutigisumik piumasaqartoqarnera akuerineqassappat ataatsimeeqataajunnanngikkaluarpunga, Bendt Bendtsen oqarpoq.

Dansk Folkepartiip piumasaqaatai naalakkersuisooqatigiinnit isumaqatigineqanngikkaluartut taakku akornanni oqaloqatigiittoqarsimavoq. Illuatungeriillu arlaannik aaqqiissuteqarsinnaallutik neriuuteqartut Kristian Thulesen Dahlimit ima oqaluttuarineqarpoq:

- Danmarkimi inuussutissat nakkutigineqarnerulernissaat anguniarlugu arfinilinnik erseqqissunik siunnersuusiorsimavugut. Naalakkersuisooqatigiit namminneq aalajangissavaat siunnersuutigut atussanerlugit, Dansk Folkepartimi ilaasortaq Kristian Thulesen Dahl naggasiivoq.