'Danmarkimi inuuneq pitsaanerusoq' qitornarsianut aamma atuutsinneqassaaq
Kalaallit meeqqat, kisimiitillugit danskinik angajoqqaarsiaqartinneqartut ilungersunarnerusumik inisissimakkajuttarput. Tamannalu Aalborgip Kommuniata maanna iliuuseqarfiginialerpaa.
- Meeqqat inissinneqarsimasut ilarpassui Danmarkimi meeqqat atuarfianni atuaqatigiinni kalaalersatuaasarput. Peqatigisaanillu angajoqqaaminnit arsaarinnissutigineqarsimasuupput, taamaattoqarneratigullu kulturertik katakkiartuaalersarpaat, Lone Holmen, Foreningen Grønlandske Børnimi suliniutinik suliaqartoq taama oqarpoq.
Suleqatigiinnerup annertusarneqarnerani meeqqat sapaatit-akunnerata naanerani tammaarsimaaqatigiissittarnissaannut meeqqallu inissinneqarsimasut angajoqqaarsiaasa immikkut sammisaqartillugit unnukkut naapisimaartittarnissaannut Aalborgip Kommuniata aningaasassarsiornissaq ilaatigut isumagissavaa.
Tamatuma saniatigut kalaallit meeqqat ajornartorsiuteqartut, taamatut periarfissinneqarnermikkut iluaqutserneqarsinnaasut kommunip ujartussavai.
Aalborgimi suliniut iluatsitsiffiulluassappat Foreningen Grønlandske Børnip Danmarkimi kommunit sinnerinik suleqateqarnini annertusarniarpaa - Københavnip, Aarhusip, Odensep Esbjegillu kommunii aallaqqaasiutigissallugit.
