Danmarkimi inupiluuserniat akiniaqattaattut

Aallaasersorlutik akiniaqattaattut, Nuummit Nørrebromut siorna nuuttut malugaat. Sissuerneruleramillu unnukkut pisuttuarusukkunnaarput.
Allattoq Elisa Isaksen
marsip 03-at 2009 13:45

Inupiluuserniaqatigiit nunanit allanit kingoqqisut rockerillu imminnut akiniaasaqattaannerat Københavnimi sakkortusiartuinnarpoq. Ullut pingasut kingulliit ingerlanerinnaanni marlunnik toqutsisoqarpoq, ataaseq Amagerimi aappaalu Nørrebromi. Minnerunngitsumik Nørrebromi najugallit akiniaasaqattaannerit misillerfigaat. Københavnimi Kalaallit Illuutaanni ilinniagaqartunut siunnersortitut atorfilik, Pia Rosing Heilmann, Nuummiit Nørrebromut aasaq nuussimatsiartoq aallaasersornerit akulikilliartulerput. Taanna oqaluttuarpoq internetcafemi ornittakkamini aallaasersortoqarmat, ungasinngisaannilu allamik aallaasersortoqarluni tamakkua toqqissisimananngitsut, kiisalu ullut ilaanni suliffimminiit soraarami, aqqusineq politiit assersorsimammassuk aamma angerlarsinnaasimanani. Annertuumilli toqqissisimanngissutiginngikkaluarlugit anigaangamik sissuernerusarlutik, soorlu biilit saneqquttut arriilligaangata inuit qanoq isikkoqarneri misissortalerlugit. Unnukkullu nerereeraangamik pisuttuartaraluarlutik piffissaq kingulleq unnukkut aninaveersaalerlutik.