Danmarkimi inuit 299-it coronamik toqquteqartut

Danmarkimi coronamik tunillatsissimallutik napparsimmavimmut unitsinneqartartut ikiliartuinnarput, taakkulu maanna 380-iullutik.
Danmarkimi inuit 380-it napparsimmavimmi maanna uninngapput, taakkunannga 93-it peruluttut uninngavianniipput. Assi © : Scanpix
Allattoq Ritzau
apriilip 14-at 2020 11:47
Nutserisoq Connie Fontain

Danmarkimik coronavirusimik tunillatsissimallutik toqusut maanna 299-iupput.

Taakku ataasinngornermi naatsorsuinermit 14-inik amerlanerusut, Statens Serum Institutip kisitsisaataasa marlunngornermi takutippaat.

Coronamik tunillatsissimatillutik toqusut ilumut coronavirusimik toqquteqarnersut qulakkeerlugu oqaatigineqarsinnaanngilaq.

Toqusut coronavirusimik tunillatsinnermit ullut 30-t iluanni toqugaangamik coronavirusimik aallaaveqartumik Covid-19-imik toqquteqartunut naatsorsuinermut ilaatinneqartarput.

Toqusut ilarpassui ilungersunartumik assersuutigalugu puamikkut uummatimikkullu nappaatinik aamma sukkornermik napparsimasuusut siusinnerusukkut saqqummiunneqarpoq.

Coronamik tunillatsissimallutik napparsimmavimmut unitsinneqartut ulluni kingullerni ikiliartuinnartut naatsorsuinerup kingulliup aamma takutippaa.

AAMMA ATUARUK Kalaallit Peqqissartut Illuanni marluk coronavirusimik tunillanneqarsimasut

Inuit 380-it napparsimmavimmi maanna uninngapput, taakkunannga 93-it peruluttut uninngavianniipput. Taakkunanngalu 80-it anersaartuuteqartinneqartariaqarlutik.

Napparsimmavimmi uninngasut ataasinngornermi 388-iupput, 100-it peruluttut uninngavianni, 87-illu anersaartuuteqartinneqarlutik.

Nunap immikkoortuani agguataarnerit qimerlooraanni illoqarfiit pingaarnersaanni napparsimmavimmut unitsinneqarsimasut suli amerlanerpaapput.

Illoqarfiit pingaarnersaanni coronamik tunillatsissimaneq pissutigalugu napparsimmavinnut unitsinneqarsimasut 196-iupput.

Coronamik tunillatsissimasut peqqisseqqissimasulli kisitsisaat oqartussanit marlunngornermi aamma aaqqinneqarput.

Inuit 2515-it virusimik tunillatsissimasut peqqisseqqissimapput.

Taakku ataasinngornermi naatsorsuinermit 280-inik amerlanerupput.

Peqqinnissamut oqartussat taakku ”tunillatsissimanermit qaangiisimasutut” eqqartorpaat , peqqissilluinnartutullu nalunaaruteqarnerunani.

Virusimik tunillatsissimasut napparsimmavimmut ullut 14-it ingerlaneranni unitsinneqarsimanngikkunik toqusimanngikkunilluunniit tunillatsissimanermik qaangiisimasutut oqaatigineqartarput.

Danmarkimi tunillatsissimasut 6496-inut amerlisimasut peqqinnissamut oqartussat marlunngornermi oqaatigaat.

Danmarkimi coronavirumik tunillatsissimanersut misissorneqartut katillugit 73.919-iupput.

AAMMA ATUARUK Danskit naalakkersuisuisa Danmark poorskip kingorna arriitsumik ammariartoqqinniaraat

Kisitsisit maannamut takusimasatsitut toqqissumik ingerlaannarunik Danmark poorskip kingorna annertusiartortumik ammaqqikkiartussasoq ministeriunerup, Mette Frederiksenip (S) siumut kalerriutiginikuuaa.

Ataatsimoortumik angallanneq marlunngornermi aallarteqqippoq ulluneranilu paaqqiffiit atuarfiillu ilarpassui pingasunngornermi ammaqqinnissaat naatsorsuutigineqarpoq.

Ministeriuneqarfik Danmarkimi tunillatsissimasut amerlassusaasa ineriartornerat peqqinnissaqarfimmilu inissaqartitsinermi killiffiit pillugit saqqummiiniarluni tusagassiortunut marlunngornermi ualikkut katersortitsiniarpoq.

/ritzau/