Danmarkimi innuttaasut ataatsimiinneranni issittoq sammineqassaaq

Danmarkimi innuttaasut Bornholmimi ataatsimiinnerat ukiormanna juunip aqqarnganit 14-iata tungaanut ingerlanneqalerpat Issittoq aamma sammineqassaaq.
Assi © : Venstre/Flickr
Allattoq Laura Aggernæs
maajip 18-at 2015 06:09
Nutserisoq Simon Uldum -

Innuttaasut ataatsimiinnissaannut pilersaarummi tamanna atuarneqarsinnaavoq. Ukiumoortumik politikkikkut aaqqissuussineruvoq, danskit tusagassiortuinit politikeriniillu ornigarluarneqartartoq.

Juunillu ulluisa aqqarnganni oqaluuserineqartussat ilagaat 'Naalagaaffeqatigiit Issittumi Naalagaaffittut'.

Tusagassiortup Martin Breumip atuakkiani kingulleq "Balladen om Grønland" (Kalaallit Nunaata assortuussutaanera) aallaavigalugu Kalaallit Nunaat kalaallillu namminiilivinnissaminnik takorlugaat oqaluttuarissavai. DTU Spacemi ilisimatuut pisortaata Jens Olag Pepke Pedersenip Issittumi teknikkikkut periarfissat aporfiusinnaasullu oqaluttuarissavai. Kiisalu Forsvarsakademietimi naliliisartup Johannes Nordbyp danskit naalakkersuisuisa Issittoq pillugu anguniagaasa naammassinissaannut Illersornissamut qullersaqarfimmut sutigut piumasaqaatitaqarnersoq oqaluttuarissavaa.

Tamatuminnga aaqqissuisuussapput Forsvarsakademiet aamma Hjemmeværnet.

 

Issittumi periarfissat aporfiusinnaasullu nutaat

Juunillu 13-iani oqallissaarut 'Issittoq imartami nutaami, qanoq aqussaagut?', silap pissusiata allanngoriartornerata Issittumi periarfissanik aporfiusinnaasunillu nutaanik pilersitsineranik aallaaveqartoq malinnaavigineqarsinnaavoq.

Sammisaq taanna Inuit Ataqatigiit siulittaasuannit Sara Olsvigimit, Amerikamiut Danmarkimi aallartitaannit Rufus Giffordimit, Canadamiut Danmarkimi aallartitaannit André François Girouximit, Nunat avannarliit siunnersuisooqatigiivinit Finn Sørensenimit (E) kiisalu Nunani avannarlerni ministerit siunnersuisooqatigiiffiannit Dagfinn Høybråtenimit oqallisigineqassaaq.

Tamatuminnga aaqqissuisuussapput Norden i Fokus, Forsvarsakademiet aamma Folketingi.

Nunatsinnut attuumassutilinnik allanik aamma aaqqissuussaqassaaq.

 

Filmit oqallinnerlu

Amerikamiut sakkutuuisa timmisartuata qaartartunik usillip B52-ip Pituffimmi sakkutooqarfiup eqqaani nakkarnera pillugu filmiliaq 'Idealisten' juunip 12-iani takutinneqassaaq, kingornalu aviisimi Politikenimi aaqqissuisuunermit Bo Lidegaardimit Inatsisartullu siulittaasuannit Lars-Emil Johansenimit oqallisigineqassalluni. Kalaallit filmiliaat naliliisartunit nersualaarneqartoq 'SUME - Mumisitsinerup nipaa' ulloq taanna aamma takutinneqassaaq.

Aammattaaq juunip 13-iani oqalugiartoqassaaq, meeqqat sumiginnagaasimasut pillugit Nunatsinni suliniutaasoq oqalugiaatigineqassalluni.

Innuttaasut ataatsimiinnerannut pilersaarut tamakkiisoq uani atuarneqarsinnaavoq: https://kalender.brk.dk/event/list