Danmarkimi ilinniartut ilanngaateqaannassapput

Kalaallit ilinniagaqartut siusinnerusukkut ukiumut akileraarutitaqanngitsunik 71.000 kruuninik isertitsisinnaanikuugaluarput. Januarimiilli tamanna 42.900 kruunimut appartinneqarpoq. Tamanna pivoq naalakkersuisooqatigiit amerlanerussuteqartut VKO akileraarutinik allannguimmata,  ilinniagaqartunut nunani allaneersunut ilanngaatip apparneqarneranik kinguneqartumik – tamannalu savalimmiormiunut aamma kalaallinut atuuppoq.

Akileraarutit pillugit inatsisit nutaat ilinniartunit tupaallaatigineqaqaat. Taakkununnga ilaavoq Nivi Christensen, Københavnip Universititiani eqqumiitsuliornerup oqaluttuassartaanik ilinniagaqartoq.

-  Ajuusaarsimaqaanga uannut pingaaruteqartorujussuummat. Ullormiit ullormut ilanngaat annertooq peerneqarpoq – tamannalu iluamik eqqartorneqanngilaq. Taamaattumik tamanna assut tupaallaatigisimavara.

Maannakkulli Danmarkimi naalakkersuisut allamik isumaqalersimapput. Inatsisissatut siunnersuut nutaaq maanna imaalerpoq, kalaallinut aamma savalimmiormiunut ukiumut immikkut ilanngaat 36.000 kruuninik annertussusilik pineqarsinnaanngussalluni. Taamaalilluni ilanngaat januari sioqqullugu atuussimagaluartoq atuuteqqilissalluni.

- Tamanna uannut pingaaruteqartorujussuuvoq.

Allannguut Nivi Christensenimut akileraarutitigut sipaarutaassaaq.

- Inuit ilaasa tamanna suli paasinngilaat, taamaattumillu siumoortumik nalunaarutissaq suli immersornikuunagu. Paasigunikkuli suli uanniit eqqissiallannerussapput.

Taassuma aamma oqaatigaa ilanngaat ilinniartunut pingaaruteqarluinnartuusoq.   

- Ukiup ataatsip ingerlanerani aningaasat sipaarsinnaasakka amerlanerulissapput. Inissiamik pisinikuuvunga tamannalu malillugu aningaasaqarnera ingerlappara. 

Ilinniartulli amerlasuut Nivi Christensenimiit suli annerusumik eqqugaassapput, ilanngaammi ima apparsimatigaaq ilinniartut saniatigut suliffeqartut akileraarutinut akiliinerusalersimallutik.

- Inatsisissatullu siunnersuut atuutilissanngippat ilinniartut 4.600 kruuninik ilinniagaqarnersiuteqartut akileraarutinut akiliinerusalissapput.

Inatsisissatut siunnersuut Folketingimi suliarineqareerpat ukiup akileraaruseriffiup sinnerani atuutissaaq, ilinniartullu aningaasatigut eqqornerlunneqassanngillat, taamaattorli nammineerluni immersugassap immersornissaa pisariunerulaassaaq.