Danmarkimi ilinniartut: Aningaasanik amerlanernik nassitsigut
Danmarkimi ilinniartut Aviak Lange, Navarana Lennert aamma Inuuteq Hendriksen oqarput, Kalaallit Nunaanni ilinniartutulli amerlatigisunik ilinniagaqarnersiutisisaraluarlutik, sutigut tamatigut aningaasartuuteqarnerullutik, allaallu amigartoortarlutik. Taamaammat Danmarkimi ilinniarnitsinnut atatillugu tapisiagut amerlanerusariaqarput, Aviaq Lange oqarpoq.
- Maani Danmarkimi akiligassaqarnerugatta. Ineqarnermut qaammammut 2.400 koruunit, kiassarnermut, atuakkanut, atortussanut angallannermullu, assersuutigalugu cykeleqanngikkaanni bussernermut qaammammut minnerpaamik 500 koruuneertoqartarpoq, Aviaq Lange oqarpoq.
Ilinniagaqarnersiutit ikippallarnerarpai qaammallu januaari ima assersuuteqarfigalugu.
- Aningaasartuutikka 6.600 koruunit missaanniipput ilinniagaqarnersiutinnattarpungalu 4.600 koruuninik. Danmarkimi inuuniarluni naalliunnalaartorujussuuvoq. Aningaasaateqarpiarani nukissanik atuinartorujussuugami - nerisassanik amigaateqakujulluni atuarniarsaraluni, nangippoq.
Ilinniagaqarnersiuteqartitsivik ukiumut 12.000 koruuninik atukkiisinnaasarpoq.
- Semesterimut aningaasanik 6.000 koruuninik atorsinnaasarpugut, kisianni taakku naammanngillat. Aningaasartuuteqarnerusaratta, aningaasat ukiup affaata sinneranut naammanneq ajorput, erseqqissaavoq.
Nammineq sulisarnikuusimagaluarpoq, kisianni piffissamik tigusisorujussuunera pillugu suliunnaaginnarsimalluni.
- Ilinniarninnut ajoqutaalermat sulinera unitsiinnarnikuuara, Aviak Lange Danmarks Tekniske Universitetimi arktisk ingeniørinngoriartoq Kim Brejnholdtimut oqarpoq.